Sto stypiendyjataŭ, łaŭreataŭ, premijantaŭ i dypłamantaŭ Śpiecyjalnaha fondu prezidenta Respubliki Biełaruś pa padtrymcy talenavitaj moładzi i adoranych studentaŭ i navučencaŭ admovilisia ad zvańnia i ŭsich pryvilejaŭ. Taksama jany apublikavali adkrytuju zajavu — TUT.BY pryvodzić jaje.
«Niemahčyma nasić zvańnie łaŭreata stypiendyi prezidenta, kali prezident dapuskaje ŭ krainie padman i źvierskaje źbićcio svaich ža suhramadzian», — tak rastłumačyli svaje dziejańni maładyja ludzi, dasłaŭšy nam list.
Tekst samoha lista ad stypiendyjataŭ, łaŭreataŭ, premijantaŭ i dypłamantaŭ pryvodzim nižej:
«My zajaŭlajem: nam soramna nieści hetaje zvańnie. Tak zdaryłasia, što biełarusy bolš nie adčuvajuć siabie ŭ biaśpiecy ŭ svajoj krainie. My nie možam spakojna znachodzicca na vulicy, my nie možam vykazvać svajo mierkavańnie, u krainie panuje atmaśfiera abureńnia i strachu. Dziaviataha žniŭnia byli praviedzienyja vybary prezidenta RB, vyniki jakich vyklikajuć sumnievy ŭ bolšaści biełaruskich hramadzian, jakija pražyvajuć u krainie i za jaje miežami. Narod zrabiŭ svoj vybar, ale čamuści hety vybar nie byŭ uličany. My nazirali manipulacyi sa składam i cisk na vybarčyja kamisii, niepavahu da niezaležnych naziralnikaŭ i aburalnyja parušeńni vybarčaha pracesu. My nie pryznajom aficyjnyja vyniki hetaj prezidenckaj kampanii.
Toje, što adbyvajecca apošnija dni, nie adpaviadaje pryncypam svabodnaha demakratyčnaha hramadstva i statutu Kanstytucyi. My bačyli, ź jakoj žorstkaściu zatrymlivajuć mirnych pratestantaŭ i minakoŭ, my viedajem, jak dalej pracuje sudovaja sistema, my čuli pra niečałaviečyja ŭmovy ŭtrymańnia palitviaźniaŭ u turmach. Narod choča i maje prava mirna vykazać svajo mierkavańnie, i hety narod — heta nie prapłočanyja z-za miažy «admarožanyja», narod — heta ŭsie my.
My patrabujem:
- adstaŭki Łukašenki Alaksandra Ryhoraviča z pasady prezidenta Respubliki Biełaruś
- vyzvaleńnia ŭsich palitźniavolenych i zatrymanych padčas hetaj prezidenckaj kampanii i ŭ mirnych akcyjach pratestu, źviazanych ź joj
- spynieńnia hvałtu z boku milicyi, AMAPu i armii ŭ adras mirnych hramadzian
- spynieńnia pieraśledu žurnalistaŭ niezaležnych ŚMI i skažeńnia infarmacyi ŭ dziaržaŭnych ŚMI
- praviadzieńnia novych, sumlennych vybaraŭ z dopuskam mižnarodnych i niezaležnych naziralnikaŭ i prazrystym padlikam hałasoŭ.
Tyranija nie spryjaje raźvićciu. Tyranija, jak Čornaja dzirka, pahłynaje ŭsio śvietłaje i pryhožaje. My admaŭlajemsia ad usich zvańniaŭ i pryvilejaŭ, źviazanych sa Śpiecyjalnym fondam prezidenta Respubliki Biełaruś pa padtrymcy talenavitaj moładzi i adoranych studentaŭ i navučencaŭ, u imia spraviadlivaści i miru. Hrašovyja srodki nami, pa mahčymaści, buduć pieraličanyja ŭ fond padtrymki represavanych, paciarpiełych i aštrafavanych».
A što ŭ ich byli za stypiendyi?
TUT.BY źviazaŭsia z adnym z łaŭreataŭ premii Uładzisłavam Kulikoŭskim:
— My ŭžo adpravili zajavy na vychad z fondu — usie sto čałaviek. Hrošy ŭsie atrymlivali roznyja: kamuści ich vypłačvali hadami, kamuści — razava. U niekatorych byli lhoty na žyllo, u niekatorych — na pastupleńnie. Što tyčycca mianie, heta była razavaja vypłata. Darečy, zroblenaja była vielmi cikava: pryznačanaja za dva tydni da devalvacyi. Na toj momant taja suma była ekvivalentnaja 1000 dalaram.
Taksama Uładzisłaŭ zaŭvažyŭ, što fond davaŭ pryvilei ŭ vyhladzie zaprašeńniaŭ na mierapryjemstvy z udziełam najvyšejšych asob dziaržavy.
Śpiecyjalny fond Prezidenta Respubliki Biełaruś pa padtrymcy talenavitaj moładzi stvorany Ukazam Prezidenta Respubliki Biełaruś № 18 ad 12 studzienia 1996 hoda. Jaho pryznačeńnie — finansavańnie mierapryjemstvaŭ, nakiravanych na stvareńnie ŭmoŭ dla pošuku, stanaŭleńnia i tvorčaha raźvićcia adoranaj moładzi. Srodki ŭ fond vyłučajucca z reziervovaha fondu prezidenta Respubliki Biełaruś, dobraachvotnych uznosaŭ u vyhladzie hrašovych srodkaŭ hramadzian Respubliki Biełaruś, zamiežnych hramadzian i asob biez hramadzianstva, a taksama jurydyčnych asob i inšych pastupleńniaŭ.
