Fota Nadziei Bužan
Na Minskim zavodzie kołavych ciahačoŭ stvaryli strajkavy kamitet. Na pradpryjemstvie majuć namier u bližejšyja dni vyrašyć, ci buduć dałučacca da strajku, piša Tut.by
Rabotniki taksama skłali śpis patrabavańniaŭ, siarod ich — padtrymać adchileńnie nielehitymnaj ułady, praviadzieńnie novych vybaraŭ, zabiaśpiečyć vyzvaleńnie palitviaźniaŭ i niedapuščalnaść hvałtu da rabotnikaŭ zavoda z-za hramadzianskaj pazicyi.
Rabotniki MZKC raspaviadajuć, što na pradpryjemstvie ładzili papiarednie schod z nahody strajku. «Sabrałasia kala 200 čałaviek. Skłali zajavu sa standartnymi patrabavańniam pa adstaŭcy ŭrada i inšymi, — adznačaje adzin z rabotnikaŭ pradpryjemstva. — Ale adrazu paśla schodu pačaŭsia cisk z boku kiraŭnictva. Skazali, što buduć zdymać 20% premii za parušeńnie praviłaŭ unutranaha rasparadku. Pahražajuć pieravieści na 2/3 taryfnaj staŭki».
Strajkavy kamitet budzie vyśviatlać u najbližejšyja dni ŭ rabotnikaŭ, ci hatovyja jany da praviadzieńnia zabastoŭki ŭ vypadku nievykanańnia ich patrabavańniaŭ.
Nahadajem, na hetym tydni na MZKC pryjazdžaŭ Alaksandr Łukašenka. Jon prylacieŭ na pradpryjemstva na viertalocie, pahutaryŭ z rabočymi ŭ cechach i vyjšaŭ da ludziej na vulicy. Jaho sustreli krykami «Sychodź!».
Da hetaha hiendyrektar pradpryjemstva Alaksiej Rymašeŭski raspavioŭ na sustrečy z rabotnikami, što hałasavaŭ na vybarach za Łukašenku, pry hetym zajaviŭ: «Ja pryznaju, što jon (Łukašenka) nie vyjhraŭ vybary».
