Žurnalisty badaj źviedali ŭsio: turbavańni złačyncaŭ, jakija zastalisia niezadavolenymi vykryvalnickimi artykułami, pieraśledy z boku skarumpavanych uładaŭ... Ale ŭ Aŭstralii tamtejšyja akuły piara sutyknulisia z absalutna novaj pahrozaj: žyvoj akułaj la paroha redakcyi.
Akuła vida «Port Džeksan», daŭžynioju 70 sm, pad pokryvam ciemry była kinuta la dźviarej ofisa haziety The Standart horada Varnambuł, na paŭnočnym uschodzie štatu Viktoryja. «Nas vyklikali i my ŭbačyli akułu, što lažała kala samieńkaha paroha redakcyi, — raspaviadaje miascovy palicyjant. — My vylili na jaje vadu, kab pabačyć, ci jana žyvaja: akuła pačała trapiečycca i ściabać chvastom».
Palicyjanty zapchnuli akułu ŭ viadro z vadoj i zanieśli na akijan. Heta davolia biaskryŭdny vid, jaki charčujecca zbolšaha rybami, marskimi vožykami i rakami dy moža dasiahać daŭžyni paŭtara mietry.
«Nam nichto nikoli nie pahražaŭ, tamu my paradkam źbiantežanyja», — skazali ŭ redakcyi haziety. Darma što ŭsie kancy viaduć u vodu, pa fakcie palicyja maje namier pravieści śledstva.
