Vadzim Dzieviatoŭski druhi źleva, fota Tut.by
24 vieraśnia ŭ Minsku prajšła pazačarhovaja kanfierencyja Biełaruskaj fiederacyi lohkaj atletyki. Novym staršynioj BFŁA abrany dvuchrazovy pryzior Alimpijskich hulniaŭ, małatabojec Ivan Cichan. Na hetaj pasadzie jon źmianiŭ viadomaha lohkaatleta i deputata Vadzima Dzieviatoŭskaha, jaki ŭznačalvaŭ fiederacyju z 2014 hoda, piša Tut.by.
Cichan, darečy, prysutničaŭ učora na inaŭhuracyi Alaksandra Łukašenki, a padčas naviedvańnia Hrodna ŭ žniŭni kiraŭnik dziaržavy padziakavaŭ spartoŭcu «za toje, što nie zdradziŭ» i abiacaŭ pahavaryć ź im paźniej.
— Karystajučysia vypadkam, ja chacieŭ by vykazać vialikaje słova padziaki za vašu pracu. Dziakujučy suładnaj pracy Fiederacyi, mnohija prajekty stali vizitnaj kartkaj našaj karalevy sportu. Kalektyŭ, jaki Vadzim Anatoljevič źbiraŭ pa krupinkach, adbyŭsia ŭ dasiahnieńni vynikaŭ.
«Siońnia my abaviazany być adzinaj cełasnaj siamjoj i vyrašać usie prablemy ŭnutry. My pierš za ŭsio pavinny dapamahčy Vadzimu Anatoljeviču adnavić svajo zdaroŭje i viarnucca ŭ našy šerahi. Jon budzie pobač z nami zaŭsiody, navat kali siońnia sydzie na adpačynak. My budziem čakać jaho ź nieciarpieńniem. Davajcie siońnia adsuniem usie prablemy ŭ baki, prafiesijna i sumlenna robiačy toje, što my ŭmiejem, kab radavać zaŭziataraŭ svaimi vynikami», — skazaŭ Cichan.
Što tyčycca Vadzima Dzieviatoŭskaha, to kala miesiaca tamu jon daŭ intervju, dzie zajaviŭ, što rasčaravaŭsia ŭ ciapierašniaj uładzie, jakuju raniej padtrymlivaŭ. Paśla hetaha staršynia BFŁA nie adkazvaŭ na zvanki žurnalistaŭ i nie vychodziŭ na suviaź. U fiederacyi na pytańni pra Vadzima Anatoljeviča adkazvali: «Jon u adpačynku».
Siońnia jon prakamientavaŭ svoj sychod.
— Nichto mianie nie papraknie, što ja štosiekundna nie žyŭ prablemami lohkaj atletyki. Ja viedaju dušy našych spartsmienaŭ, žyŭ hetymi prablemami štochvilinna, dumajučy pra toje, jak zrabić lepš, kab my hučali jašče raniej i lepš.
Mnie časta kazali: bieražycie siabie. Ale arhanizm daŭ zboj, i mnie nieabchodna adnaŭleńnie. Heta vymušanaja miera. Ale mnie nie chočacca, kab zadadzieny temp spyniaŭsia.
