Sietkavaje vydańnie «Mieduza» zrabiła rasśledavańnie ab raspracoŭcy prahramy dla vyznačeńnia asoby siłavikoŭ, jakija pracujuć na mirnych akcyjach pratestu ŭ Biełarusi. Pra isnavańnie takoha softu raspaviadaŭ biełaruski raspracoŭščyk Andrej Maksimaŭ u jutub-roliku na svaim kanale (rolik nabraŭ užo bolš za 1 młn prahladaŭ).
Jon zajaviŭ, što ałharytm zdolny raspaznać tvar čałavieka, jaki ŭdzielničaje ŭ zadušeńni pratestaŭ, navat kali jon schavany za maskaj, furažkaj abo bałakłavaj. U roliku było pakazana, jak pracuje hetaja prahrama.
Maksimaŭ raspavioŭ «Mieduzie», što raspracoŭkaj softu dla raspaznańnia asob «jon zajmajecca ŭ składzie niefarmalnaj hrupy IT-śpiecyjalistaŭ». Heta ŭ asnoŭnym biełarusy, jakija pražyvajuć u ZŠA. «Plus niekalki zamiežnikaŭ dapamahajuć. Pieršyja niekalki tydniaŭ, kali pačaŭsia ŭvieś hety kašmar, ja prosta źbiraŭ hrošy i adsyłaŭ ich tudy dla padtrymki ludziej, ale chutka stała zrazumieła, što treba rabić niešta bolšaje — i pryjšła ideja zaniacca voś takim ličbavym aktyvizmam».
«Mieduza» źviarnuła ŭvahu na toje, što siłaviki, jakich «raspaznaje» prahrama na roliku Maksimava, užo byli deanamizavanyja ŭ telehram-kanale «Karniki Biełarusi archiŭ». Maksimaŭ pryznaŭsia, što niekatoryja prykłady deananimizacyi, pryviedzienyja ŭ roliku, — heta nie vynik pracy sistemy raspaznańnia, a prostaje zapazyčańnie z telehram-kanała, a ałharytm pakul nie hatovy.
«My nie źbiralisia tak chutka pakazvać svoj prajekt, ale z-za raptoŭnaj inaŭhuracyi [Łukašenki] i z-za eskałacyi ŭzroŭniu hvałtu pierad nami ŭstaŭ niaprosty vybar — i jon byŭ zrobleny na karyść taho, kab u śpiešnym paradku prademanstravać toje, što ŭ nas jość. Nam zachaciełasia pastavić siłavikoŭ na ŭlik — dać im zrazumieć, što ŭsie technałohii, jakija patrebnyja, kab ich identyfikavać, isnujuć i što z časam ich poŭnaja identyfikacyja niepaźbiežnaja».
Andrej Maksimaŭ — biełaruski raspracoŭščyk hulniaŭ, ciapier jon žyvie ŭ Kalifornii. Svaju karjeru jon pačynaŭ 3D-mastakom u biełaruskim ofisie Wargaming, a paśla pierajezdu ŭ Łos-Andželes uładkavaŭsia ŭ kampaniju Naughty Dog, dzie chutka vyras da art-dyrektara i pracavaŭ nad Uncharted i The Last of Us — dźviuma hałoŭnymi franšyzami kampanii.
Raspaznańniem tvaraŭ Maksimaŭ raniej nie zajmaŭsia, apošni jaho prajekt — heta instrumient Promethean AI dla stvareńnia 3D-kantentu ŭ hulniach pry dapamozie štučnaha intelektu. Prahrama raspaznaje hałasavyja kamandy i vizualizuje toje, što joj kaža mastak.
