Siońnia ranicaj siastra matrosa-vyratavalnika Leanida Buhra ŭ vałanciorskich śpisach vyjaviła: jaje brat užo nie na Akreścina, a ŭ Žodzinie, jamu prysudzili 13 sutak. Napiaredadni siamja sprabavała daviedacca, dzie budzie prachodzić sudovaje pasiadžeńnie i pa jakim artykule zatrymali 20-hadovaha Leanida, piša Tut.by.
Bratu dali 13 dzion, siońnia znajšła jahonaje proźvišča ŭ śpisach tych, chto znachodzicca ŭ Žodzinie. Akazvajecca, sud byŭ učora, ale nijakaj infarmacyi ŭ nas nie było. Dla Leanida na Akreścina ŭ paniadziełak pryniali pieradaču, atrymaŭ jon jaje ci nie, nie viedaju, — raspaviadaje Tut.by Kaciaryna, siastra zatrymanaha supracoŭnika Asvoda.
Matros-vyratavalnik Leanid Buhor byŭ zatrymany prosta na pracy 27 vieraśnia. U toj dzień prachodziŭ niadzielny marš, Leanid razam z dvuma inšymi kalehami dziažuryŭ na vadzie niedaloka ad Banka raźvićcia. Za što kankretna matros-vyratavalnik apynuŭsia ŭ izalatary i jaki artykuł jamu staviać u vinu, siamja sprabavała daviedacca ceły dzień.
Užo paśla publikacyi tekstu z redakcyjaj źviazalisia vidavočcy. Jany raspaviadajuć: padčas maršu, jak tolki chvost kałony pierasiok most pa praśpiekcie Mašerava, na most pryjechali mikraaŭtobusy, vybiehli ludzi ŭ čornym i pačalisia zatrymańni.
— Z łodki chtości kryknuŭ: «Navošta vy jaho tak žorstka zatrymlivajecie?» Adrazu adzin amapaviec adreahavaŭ prykładna tak: «Što ty skazaŭ? Padpłyvaj siudy». Jany padpłyli, i pačałasia razmova. My pajšli dalej, — uspaminaje Viktoryja.
A inšaja Viktoryja navat zrabiła niekalki karotkich videa taho, što adbyvałasia na bierazie paśla 16:00. Pa słovach supracoŭnikaŭ Asvoda, čałaviek u čornym, jakoha advodziać siłaviki na videa, — ich kaleha.
— Pa vadzie płavali dźvie łodki, u kožnaj siadzieła pa try čałavieki. Kali amapaŭcy pabiehli da raki, jany stali patrabavać, kab łodki padpłyli i kahości im addali. Ja tady nie zrazumieła: treba addać kaho-niebudź sa svaich abo taho, chto da ich zaskočyŭ. U vyniku padpłyła adna łodka i addali chłopca ŭ čornym, — raspaviadaje vidavočca.
Pa jaje słovach, supracoŭniki Asvoda ŭdaryli.
U paniadziełak siamja zatrymanaha vyratavalnika sprabavała daviedacca, jaki sud i kali budzie razhladać spravu. Jak stała viadoma Tut.by, učora spravu razhledzieła sudździa Frunzienskaha rajona Minska Hanna Bujnoŭskaja.
— Leanida asudzili na 13 sutak pa č. 1 art. 23. 34 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Jak jon moh udzielničać u mitynhu na katery? Jon jechaŭ pa praśpiekcie ci što, prosta pa prajeznaj častcy? — zadajucca pytańniami supracoŭniki Asvoda.
Tut.by źviarnuŭsia pa kamientar u HUUS Minharvykankama.
