Fota z sustrečy ŭ Čarnihavie 20 studzienia, president.gov.ua
Łukašenka i Juščanka sustrenucca 6 traŭnia ŭ Homieli. Temaj pieramovaŭ budzie prahrama ES «Uschodniaje partniorstva», da ŭdziełu ŭ jakoj zaprošany Biełaruś i Ukraina. Juščanka paśla hetaha pajedzie ŭ Prahu, Łukašenka — nie.
Sustreča prezidentaŭ Biełarusi i Ukrainy Alaksandra Łukašenki i Viktara Juščanki adbudziecca 6 maja ŭ Homieli. Pra heta BiełaPAN paviedamili ŭ pres‑słužbie ŭkrainskaha prezidenta.
«Budzie taki ž dakładna farmat, jaki byŭ na sustrečy ŭ Čarnihavie — dvuchbakovaja sustreča, a potym sustreča ŭ pašyranym składzie. Paśla hetaha, chutčej za ŭsio, adbudziecca sumiesnaja pres‑kanfierencyja», — skazaŭ supracoŭnik pres‑słužby.
Pavodle jaho słoŭ, płanujecca, što adnoj z hałoŭnych tem pieramoŭ dvuch prezidentaŭ budzie prahrama ES «Uschodniaje partniorstva», da ŭdziełu ŭ jakoj zaprošany Biełaruś i Ukraina.
U pres‑słužbie prezidenta Biełarusi infarmacyju pra zaŭtrašniuju sustreču pakul nie paćviardžajuć.
Apošni raz A.Łukašenka i V.Juščanka sustrakalisia 20 studzienia ŭ Čarnihavie (Ukraina). Pa vynikach sustrečy prezidentaŭ byŭ padpisany šerah dakumientaŭ: miemarandum ab supracoŭnictvie ŭ enierhietyčnaj śfiery, konsulskaja kanviencyja, miemarandum pamiž uradami i nacbankami ab vypracoŭcy mier pa intensifikacyi handlova‑ekanamičnaha supracoŭnictva va ŭmovach kryzisu, mižuradavaje pahadnieńnie ab sproščanym paradku prajezdu biełaruskaha ŭčastka aŭtadarohi Słavucič — Čarnobylskaja AES rabotnikami i transpartnymi srodkami pradpryjemstvaŭ, jakija ažyćciaŭlajuć dziejnaść u zonie adčužeńnia, i pratakoła da dadzienaha pahadnieńnia.
U Čarnihavie było zajaŭlena, što sustreča premjer‑ministraŭ dźviuch krain adbudziecca «ŭ najbližejšyja dziesiać dzion», kab aformić usie dasiahnutyja na vyšejšym uzroŭni damoŭlenaści. Adnak Siarhiej Sidorski i Julija Cimašenka nie sustrelisia dahetul.
Nie zrušyłasia ź miortvaha punktu i ideja pra tranzit ukrainskaje elektraenierhii praź Biełaruś.