«Ja navučyłasia prafiesii i daviedałasia, jak pracavać nielha. Liču za lepšaje žyć z raspluščanymi vačyma. Biełarusy zasłuhoŭvajuć viedać praŭdu, jak i zasłuhoŭvajuć žyć u absalutna inšaj, lepšaj viersii svajoj krainy», — napisała siońnia ŭ svaim instahramie žurnalistka Ahienctva televizijnych navin BT Alaksandra Kavielič. I zvolniłasia.
Alaksandra išła da hetaha bolš za miesiac — siabry navat prapanoŭvali skinucca i płacić joj hrašovuju dapamohu, pakul jana nie znojdzie novuju rabotu.
Fota sa staronki ŭ Instahram
Čamu z BT praciahvajuć sychodzić ludzi? Pra heta dziaŭčyna raskazała «Našaj Nivie».
«Na BT ja pracavała z 2017 hoda. Daroha na ekran była ciažkaj: doŭha stažyravałasia, potym była redaktaram i śpiecyjalnym karespandentam.
Maja rabota nie była źviazana z aśviatleńniem palityki, pieradusim ja raskazvała pra Minsk i Minskuju vobłaść, pra ludziej talenavitych i adkrytych, pra jakich chočacca raskazać.
Ale ŭ žniŭni ŭžo niemahčyma było sychodzić ad palityčnych tem: pačali źjaŭlacca zadačy zrabić materyjały ŭ padtrymku «palityki kampanii», a što heta za «palityka» — usie razumiejuć.
Prychodziš na rabotu — atrymlivaješ daručeńnie, admaŭlacca niekarektna, ty pavinien hetaha zrabić.
Na mianie paŭpłyvaŭ materyjał pra daterminovaje hałasavańnie.
Byŭ vielmi śpiecyfičny ŭčastak, «ekśpiertaŭ» navat nie treba było apytvać — hatovyja videa mnie ŭžo pradastavili kalehi, heta ŭsio było padadziena jak paŭsiudnaja karcina, chacia sama ja razumieła, što navat tyja niešmatlikija ludzi, jakija z nami havaryli na ŭčastku, pryjšli tudy, bo ich «paprasili».
Užo ŭ siaredzinie žniŭnia nakipieła, kalektyŭ zadavaŭ pytańni: čamu my pavinny padavać infarmacyju adnaboka, pierakručvać? Heta ja asabista taksama pytała ŭ načalstva, ale nijakaha adkazu nie atrymała, adkaz adzin: kali vam nie padabajecca — vy viedajecie, što rabić.
Pry hetym na telebačańni šmat kłasnych žurnalistaŭ, ale jość ideałahičnaja viernaja kahorta, jakaja vyznačaje palityku kampanii, daje peŭnyja ŭkazańni, jak usio pavinna być.
I ja vyrašyła zvolnicca. Spačatku pajšła ŭ adpačynak, kab abdumać usio, a potym zvolniłasia. Mnie prykra ad taho, što robicca na televizary: jak padajucca naviny? Heta niedapuščalna, heta niepavaha da hledača, jaki čakaje sumlennaj infarmacyi.
Kali čałaviek hladzić tolki dziaržaŭnyja naviny, nie maje krytyčnaha myśleńnia, to jon stanovicca zakładnikam adnabokaj, niapravilnaj i niesumlennaj karciny śvietu, ja nie mahła bolš u hetym udzielničać», — skazała Alaksandra.
Pa jaje słovach, z ATN syšło kala 20 čałaviek — heta žurnalisty i apieratary.
Ahulnuju kolkaść ludziej razam z techničnym piersanałam jana aceńvaje jak «bolš za sotniu».
Dalej dziaŭčyna źbirajecca pasprabavać siabie ŭ IT.
