Niamieckija «zialonyja» rezka skrytykavali prezydenta krainy Chorsta Kiolera za jahonuju vinšavalnuju telehramu biełaruskamu lideru Alaksandru Łukašenku z nahody nacyjanalnaha śviata Biełarusi 3 lipienia. Pavodle niamieckich palitykaŭ, jany aburanyja pasłańniem bundesprezydenta na adras biełaruskaha dyktatara. «Zialonyja» śćviardžajuć, što, źviartajučysia da Łukašenki jak da partnera Niamieččyny, Kioler, hetak mović, abychodzić ahulnapryniatuju liniju.
Pavodle kiraŭnika frakcyi Fryca Kuna, padobny padychod Kiolera vyhladaje «nieprymalnym» i «niezrazumiełym». U svaim vinšavalnym pasłańni Kioler žadaje Biełarusi bolš ciesnaha supracoŭnictva ź Niamieččynaj, u tym liku, u halinie hramadzianskaj supolnaści. Adnak, hetaje supracoŭnictva, jak i supracoŭnictva ŭ inšych halinach z kožnym hodam istotna paharšajecca.
Bundesprezydent Kioler taksama prademanstravaŭ u svaim vinšavańni ŭpeŭnienaść u budučyni dvuchbakovych dačynieńniaŭ. Hetyja dačynieńni, adnak, mohuć raźvivacca pry ŭmovie pryznańnia bakami demakratyčnych kaštoŭnaściaŭ i vykanańnia imi mižnarodnych abaviazańniaŭ. Tym časam, padkreślivajuć siabry frakcyi «zialonych», režym Łukašenki nie adnojčy ihnaravaŭ mižnarodnyja pryncypy i abaviazańni. U źviazku sa šmatlikimi parušeńniami demakratyčnych pravoŭ i standartaŭ z boku biełaruskaha kiraŭnictva ŭ časie praviadzieńnia apošnich prezydenckich vybaraŭ EZ I ZŠA ŭviali sankcyi suprać viadučych mienskich čynoŭnikaŭ.
Niamieckija palityki nastojvajuć na tym, kab urad krainy vypraviŭ toje pamyłkovaje ŭražańnie, jakoje moh zrabić na hramadzkaść list Kiolera.
Deputaty Bundestahu taksama źviarnulisia da federalnaha ŭradu z tym, kab biełaruskaje pytańnie było razhledžanaje ŭ časie samitu vialikaj vaśmiorki, što adbudziecca ŭ Pieciarburhu. Havoryć siabra partyi zialonych Maryluiza Bek
(Bek) «Biełaruskaje pytańnie pavinna być uźniataje ŭ Pieciarburhu. Aficyjny Miensk pa-raniejšamu ihnaruje demakratyčnyja svabody, u tym liku svabodu presy, svabodu schodaŭ i hetak dalej, i takim čynam nadalej izalujecca ad Eŭropy. Kali Rasieja vystupaje z prapanovaj pra dyjaloh ź Biełaruśsiu, to, zrazumieła, udzielnikam pieciarburskaha samitu treba j spytacca ŭ Rasiei, jakuju rolu jana źbirajecca adyhryvać uva ŭsim hetym».
