Siarhiej Dyleŭski i Lech Vałensa, Bożena Maj.
26 kastryčnika kiraŭnik strajkamu MTZ Siarhiej Dyleŭski sustreŭsia ŭ Hdańsku ź Lecham Vałensam, lidaram histaryčnaha prafsajuzu «Salidarnaść» i pieršym prezidentam Polščy. Sustreča ź lidaram, jaki pieramoh kamunizm, supała z pačatkam narodnaj zabastoŭki ŭ Biełarusi. U ofisie Lecha Vałensy abmiarkoŭvalisia pytańni rabočych prafsajuzaŭ i maralnaha duchu strajkoŭcaŭ. Siarhiej Dyleŭski zadavaŭ pytańni, Lech Vałensa dzialiŭsia ŭłasnym vopytam kiravańnia stačkamam u 1980-ja, paviedamlaje Polskaje radyjo.
Lech Vałensa padtrymlivaje biełarusaŭ, zachaplajecca ich advahaj i žadaje pośpiechu. Pieršy prezident Polščy vykazaŭ hatoŭnaść dapamahać biełarusam usimi sposabami, pry hetym padkreśliŭšy toj fakt, što asnoŭnaja praca zaraz adbyvajecca ŭnutry Biełarusi.
«Baraćba pracoŭnych za svaje pravy ŭ Polščy była vielmi doŭhaj i ciažkaj, jana raściahnułasia na hady. My spadziajemsia spravicca chutčej», — zajaviŭ Siarhiej Dyleŭski. Były kiraŭnik strajkamu Minskaha traktarnaha zavoda i člen Prezidyuma Kaardynacyjnaha savieta pakinuŭ Biełaruś u suviazi z aściarohami za ŭłasnuju biaśpieku. Da hetaha Dyleŭski adbyŭ 25-dzionny aryšt. 11 kastryčnika kiraŭnictva MTZ vymusiła jaho zvolnicca, prystrašyŭšy pazbavić pracy baćkoŭ, jakija taksama pracujuć na MTZ. Usiaho Siarhiej Dyleŭski prapracavaŭ na MTZ 12 hadoŭ.
«Nam u Biełarusi nie dajuć rehistravać niezaležnyja prafsajuzy«, — kazaŭ Siarhiej. Lech Vałensa adkazvaŭ: «A vy nie źviartajcie na heta ŭvahu, zadača režymu — stvarać vam ciažkaści. Važnaja nie rehistracyja prafsajuza na papiery, važnyja sami ludzi».
Pierad tym, jak stać na čale prafsajuz «Salidarnaść», Lech Vałensa byŭ elektrykam Hdańskaj sudnavierfi. U 1983 h. atrymaŭ Nobieleŭskuju premiju miru, a ŭ 1990 hodzie staŭ pieršym prezidentam Polščy, prabyŭšy na hetaj pasadzie piać hadoŭ. «Salidarnaść» daviała da źviaržeńnia kamunistyčnaha režymu ŭ Polščy, tamu rabočych Hdańskaj sudnavierfi praz 40 hadoŭ pamiatajuć i šanujuć va ŭsim śviecie jak hierojaŭ. Paśla Lecha Vałensy ŭ Respublicy Polšča zamianilisia čatyry prezidenty.
