Uviečary 27 kastryčnika ŭ telehram-kanałach źjavilisia fota zahadu ab adličeńni troch studentaŭ BDAM. Jak minimum adnaho ź ich — za ŭdzieł u akcyi. Jašče dvum — aficyjna zrabili vymovu. Dakumient ustupiŭ u siłu z 26 kastryčnika, piša Tut.by.
U tekście zahadu havorycca, što Sierafima Haničava (3 kurs), Alaksandra Daniłkina (5 kurs) i Karynu Čakur (5 kurs) adličvajuć z 26.10.2020.
Podpisy prarektara pa vučebnaj rabocie Aleny Bochan i dekana mastackaha fakulteta Hanny Konanavaj pad zahadam adsutničajuć.
Adzin z adličanych studentaŭ kaža, što ŭsio pačałosia 26 kastryčnika. Tady jaho vyklikali na prafiłaktyčnuju hutarku ź pieršym prarektaram Śviatłanaj Vinakuravaj:
— U jaje kabiniecie było čatyry čałavieki: jana, juryst akademii i niejkija mužčyna i žančyna, napeŭna, z administracyi. Ja adkazaŭ, jak usie i było: udzielničaŭ u akcyi, tak.
Paśla hetaha, pa słovach studenta, prarektar Vinakurava pačała kazać, što «palityka za miežami mastactva»:
— I, maŭlaŭ, kali chočacie, chadzicie ŭ palityčnuju VNU. Paśla hetaha jana skazała, što ŭ mianie vymova, i heta ŭžo druhaja vymova. Choć pieršaja była letam 2019 i, pa idei, jana pavinna być anulavana. Za hety navučalny hod u mianie vymoŭ niama. Ci ja čahości nie viedaju? Uvohule, chvilin 30 tamu ja daviedaŭsia ab svaim adličeńni, — dadaŭ student. My hutaryli ŭ 18.40 27 kastryčnika.
U praviłach unutranaha rasparadku biełaruskich VNU zvyčajna napisana: adličeńnie, jak miera dyscyplinarnaj adkaznaści, moža być prymieniena za sistematyčnaje (paŭtornaje na praciahu navučalnaha hoda) nievykanańnie abo nienaležnaje vykanańnie studentam abaviazkaŭ, uskładzienych na jaho zakanadaŭstvam.
Tut.by sprabavaŭ daviedacca padrabiaznaści ŭ rektara BDAM Michaiła Barazny, adnak u 17.57 jon nie zmoh pahavaryć z žurnalistam: sakratar paviedamiła, što ciapier jon zaniaty, a dalej zakančvajecca jaho pracoŭny dzień.
Pieršy prarektar Śviatłana Vinakurava admoviłasia kamientavać zahad, spasłaŭšysia na toje, što apošni podpis stavić rektar.
Nahadajem, 27 kastryčnika Alaksandr Łukašenka vykazaŭsia: «Chto vyjšaŭ u parušeńnie zakona na niesankcyjanavanuju akcyju, jon pazbaŭlajecca prava być studentam».
