Zvarščyk zavodu imia Kazłova Alaksandar Šymanovič ranicaj 28 kastryčnika adnios u administracyju pradpryjemstva paviedamleńnie ab dałučeńni da ahulnanacyjanalnaha strajku. Paśla abiedu jon užo atrymaŭ sms-paviedamleńnie ab pieraličeńni jamu zarobku ŭ suviazi sa zvalnieńniem, piša «Svaboda».
«Ani zvanka, ani inšaha paviedamleńnia nie było, ale dakładna paznačana, što ŭžo zvolnieny i pieraličanyja zaroblenyja hrošy. Miž tym sama mieniej u mianie musili ŭziać tłumačeńni, pierad tym jak padpisać zahad ab zvalnieńni. Chutka spracavali. Vidać, śpiašajucca adrapartavać, što vykonvajuć zahad Łukašenki pra zvalnieńni strajkoŭcaŭ», — skazaŭ Alaksandar Šymanovič «Svabodzie».
Pracaŭnik ličyć, što zvolnili jaho niezakonna, bo jon mieŭ prava na strajk z palityčnymi patrabavańniami, što harantavana Kanstytucyjaj, i papiaredziŭ pra heta administracyju.
«Nie škaduju. Ustupiŭ u Svabodny prafsajuz metalistaŭ, spadziajusia na ich jurydyčnuju padtrymku, budu abskardžvać zvalnieńnie. Jašče pazmahajemsia», — skazaŭ Alaksandar Šymanovič.
Pavodle krynic, na Mienskim elektratechničnym zavodzie imia Kazłova 26 i 27 kastryčnika nie pracavali rabočyja 6-ha i 16-ha cechaŭ, a taksama filii ŭ Kaladzičach. Usiaho ŭ roznaj formie strajk padtrymali da 70% pracaŭnikoŭ zavodu. Kolki čałaviek ciapier praciahvajuć strajk, Alaksandar Šymanovič nia viedaje.
«Čałaviek, ź jakim moh zakantačyć, čamuści nie na suviazi. Nie vyklučaju, što mianie nie adnaho zvolnili. Ničoha. Moža, Łukašenka sam pasprabuje papracavać na našych miescach? Pahladzim, jak heta ŭ jaho atrymajecca».
