U miežach prajektu «Tuzin. Pierazahruzka» internet‑partału «Tuzin Hitoŭ» i hramadzkaj kampanii «Budźma biełarusami» biare ŭdzieł «Sierdcie duraka» — hurt, za jakim zamacavaŭsia status adnoj z samych maskalnutych kamandaŭ krainy.
Adnak, lider hurta Cimafiej Jaravikoŭ usurjoz zacikaviŭsia idejaj «Pierazahruzki» — interpretacyjaj tvoru na inšaj movie. «Da biełaruskaj movy ja zaŭždy staviŭsia z naležnaj pavahaj i cikaŭnaściu», — zaŭvažaje Cimafiej.
Cimafiej Jaravikoŭ hraje rok z 14 hod. Jon pačynaŭ, jak tekstavik šerahu mahiloŭskich kamandaŭ, a nieŭzabavie staŭ vakalistam adnoj ź ich, što zvałasia «Pieriekriostok tieniej». Ułasny hurt pad nazvaj «Sierdcie duraka» jon zasnavaŭ u 2002 hodzie, jaki pastupova zvajavaŭ kultavy status. Sami muzyki kažuć, što jany nia mohuć ničym pachvalicca, akrom chiba taho, što amal u kožnym biełaruskim, ukrainskim i rasiejskim horadzie jość ich sapraŭdnyja prychilniki, a hieahrafija šyrycca nadalej, pryčym biez asablivych vysiłkaŭ z boku samoha hurta. Cikava, što fen‑klub hurta paŭstaŭ nie ŭ rodnym Mahilovie, a ŭ Maskvie, kudy Cimafiej z hurtom i bieź jaho naviedvajecca čaściakom. Muzykant nieadnojčy vystupaŭ na feście paetyčnaha roku ŭ rasiejskaj stalicy «Dažd́».
Poŭnavartasny albom «Sierdcie duraka» zapisali tolki sioleta. Jon zaviecca «Diectvo» i ŭklučaje hałoŭnyja hity kamandy i novyja tvory.Pakul hurt šukaje mahčymaści vydańnia ŭ Biełarusi, na resursie shara.by jaho za pieršy tydzień spampavali bolš za 10 000 razoŭ.
U repiertuary hurta najbolš vyłučajecca pieśnia «Propasť». Jana źjaviłasia ŭpieršyniu dva hady tamu na synhle «K načału načał». Adzin z prychilnikaŭ hurta zrabiŭ na jaje amatarskaje videa z vykarystańniem kadraŭ ź filmu «Ostrov», jakoje imhienna razyšłosia i nadała tvorčaści «Sierdcie duraka» svojeasablivuju aŭru. Kažuć, što časam zaŭziatary kamandy prosta ŭklenčvali pierad aŭtaram «Propasti». Mienavita hety tvor muzyki i prapanoŭvajuć da ŭdziełu ŭ prajekcie «Pierazahruzka». Cimafieja Jaravikova, jaki skončyŭ fakultet słavianskaj mitalohii, zacikaviła najpierš ideja — interpretacyja tvoraŭ na biełaruskaj movie. «Pieśnia vymahaje kudy mienš svabody, čym pierakład prozy ci navat paezii, tamu pierakładčyk musić mieć kudy bolšy talent, čym stvaralnik pieśni, kab nie zhubić jaje tonkija materyi dy zachavać aŭtentyčnaść hučańnia. Cikava, ci atrymajecca tak». Sam Cimafiej da biełaruskaj movy stavicca z naležnaj pavahaj i cikaŭnaściu. «Mnie pišacca pa‑rasiejsku, bo pieśnia sama abiraje movu i heta nie zaminaje joj być biełaruskaj pa‑sutnaści, bo naradžajecca jana ŭ kalarycie miascovych realizj i kulturnaha fonu», — kaža lider «Sierdca duraka».
Na biełaruskaj movie pieśniu «Propasť» biarecca pieraasensavać paet, śpiavak i pierakładčyk Aleś Kamocki.
Nastupny ŭdzielnik «Pierazahruzki» budzie pradstaŭleny 21 traŭnia.
U prajekcie «Tuzin. Pierazahruzka» internet‑partału «Tuzin Hitoŭ» i hramadzkaj kampanii «Budźma biełarusami» biaruć udzieł 12 samych cikavych ajčynnych niebiełaruskamoŭnych vykanaŭcaŭ roznych stylaŭ, jakich łučyć aryhinalnaść materyjału, prafesyjnaść u muzyčnym padychodzie i žadańnie eksperymentavać. Kožny ź ich pierazapiša adzin z svaich hitoŭ u biełaruskamoŭnym varyjancie, vykananym prafesyjnym pierakładčykam. Usie pieśni buduć prezentavanyja na staronkach Tuzin hitoŭ i budzma.org
