Na pasiadžeńni vykankama Fiederacyi chakieja Biełarusi, jakoje prajšło ŭ Minsku 19 maja, staršynia fiederacyi, były ministr unutranych spraŭ Uładzimir Navumaŭ nie pastaviŭ pytańnie ab daviery jamu.
"U mianie byŭ hety punkt u paradku dnia, ale ja pasaromieŭsia", — patłumačyŭ žurnalistam U.Navumaŭ paśla zakančeńnia pasiadžeńnia.
Pavodle słoŭ kiraŭnika FCHRB, jaho źbiła z tołku rašeńnie vykankama ŭznaharodzić jaho pryzam "Za vialiki ŭkład u raźvićcio chakieja" pa vynikach siezona-2007/08.
U.Navumaŭ zajaviŭ, što pra svaju dalejšuju rabotu ŭ chakiei i na dziaržaŭnaj słužbie budzie hatovy havaryć u vieraśni.
Na pasadu kiraŭnika FCHRB U.Navumaŭ byŭ upieršyniu abrany ŭ 2001 hodzie. Apošniaja spravazdačna-vybarnaja kanfierencyja fiederacyi adbyłasia 19 krasavika 2008 hoda.
***
6 krasavika hetaha hoda Alaksandr Łukašenka pryniaŭ adstaŭku U.Navumava z pasady ministra pa stanie zdaroŭja. U toj ža dzień na pres-kanfierencyi ŭ Minsku z nahody startu junijorskaha čempijanatu śvietu pa chakiei ŭ hrupie "A" pieršaha dyvizijona były kiraŭnik MUS zajaviŭ, što nie kamientuje svaju adstaŭku, a sa svajoj budučyniaj u chakiei vyznačycca paśla 15 maja, kali zbornaja vystupić na čempijanacie śvietu-2009 i budzie razhledžana zajaŭka Biełarusi na arhanizacyju ČS-2014. Kamanda zaniała vynikovaje vośmaje miesca, a kraina atrymała prava pravieści suśvietnaje pieršynstvo.
14 maja na pres-kanfierencyi z nahody pieramohi biełaruskaj zajaŭki na vybarach U.Navumaŭ zajaviŭ, što na pasiadžeńni vykankama fiederacyi maje namier pastavić pytańnie ab daviery jamu.
"Chaču daviedacca ŭ členaŭ vykankama ich bačańnie kiraŭnictva fiederacyi", — patłumačyŭ U.Navumaŭ. Pra rabotu na inšych pasadach, akramia staršyni FCHRB, były ministr unutranych spraŭ "da vieraśnia nie chacieŭ by dumać".
"Ja vyjšaŭ z dastatkova składanaha psichałahičnaha stanu. Zajaŭka na čempijanat śvietu padarvała siły jašče bolš. Chaciełasia b dumać pra adpačynak", — skazaŭ U.Navumaŭ.