Ministerstva pa nadzvyčajnych situacyjach uniesła źmieny ŭ Praviły pažarnaj biaśpieki dla žyłych damoŭ, budynkaŭ i zbudavańniaŭ. Ciapier na fasadach, dachach i navat na hanku budynkaŭ nielha raźmiaščać vyraby z haručaha tekstylu. Novy punkt zaćvierdžany pastanovaj №39 ad 6 kastryčnika, jano apublikavana na Nacyjanalnym pravavym partale, źviartaje ŭvahu Tut.by.
Ciapier nie dapuskajecca «raźmiaščać na fasadach, dachach i (abo) vonkavych pavierchniach vystupajučych častak budynkaŭ (terasa, hanak, prystupki i inšyja) vyraby z haručaha tekstylu, nie praduhledžanyja prajektnaj dakumientacyjaj, za vyklučeńniem vypadkaŭ, ustanoŭlenych zakanadaŭstvam».
Heta adno sa źmianieńniaŭ u Praviły pažarnaj biaśpieki dla žyłych damoŭ, budynkaŭ i zbudavańniaŭ, raźmieščanych na prydamavoj terytoryi, sadovych domikaŭ, haspadarčych budynkaŭ i zbudavańniaŭ, raźmieščanych na ziamielnym učastku, pradastaŭlenym dla viadzieńnia kalektyŭnaha sadavodstva, dač, haspadarčych budynkaŭ i zbudavańniaŭ, raźmieščanych na ziamielnym učastku, pradastaŭlenym dla dačnaha budaŭnictva.
Cikava, što heta źmianieńnie budzie prapisana ŭ Praviłach padpunktam 15.3 — pobač z zabaronaj na prymianieńnie piratechniki i raźviadzieńnie vohniščaŭ u pamiaškańniach.
Dakumient ustupaje ŭ siłu paśla aficyjnaha apublikavańnia.
Novaŭviadzieńnie moža być źviazana sa ściahami, jakija ciapier masava vyviešvajuć na damach. U biełaruskim KaAP jość artykuł za parušeńnie zakanadaŭstva ab pažarnaj biaśpiecy — 23.56. Sankcyi pa joj dla fizasoby — papiaredžańnie abo štraf da 30 bazavych vieličyń (810 rubloŭ).
