Staršynia Ruchu za Svabodu rassyłaje listy palityčnym aktyvistam pa ŭsioj krainie, zaprašajučy ich uziać u im udzieł.
Adrasataŭ — kala 5‑6 tysiač, pieravažna heta ŭdzielniki prezydenckaj vybarčaj kampanii 2006 hodu (siabry roznych arhanizacyj, partyj, biespartyjnyja).
U svaim liście Alaksandar Milinkievič vykładaje svaju pazycyju nakont novaj palityki Eŭraźviazu, jakaja sutykajecca z žorstkaj krytykaj u apazycyjnym asiarodździ. Jon, u pryvatnaści, piša:
«Padzieł unutry siońniašniaj biełaruskaj apazycyi palahaje na tym, što adny praciahvajuć zmahacca vyklučna suprać Łukašenki, a druhija — pieradusim za Biełaruś i jaje eŭrapiejski vybar. Spadziavańni pieršych — na kryzis, jaki nibyta aŭtamatyčna likviduje dyktaturu. Druhija, i ja ŭ tym liku, nia bačać nijakaha lepšaha alternatyŭnaha palityčnaha prajektu, čym zbližeńnie Biełarusi z ES».
Nia vyklučana, što Milinkievič raźličvaje znajści sabie palityčnuju bazu dla nastupnaj prezydenckaj kampanii. Varta nahadać, što jašče ŭ studzieni sioleta jon zajaviŭ, što budzie ŭdzielničać u nastupnych prezydenckich vybarach.
U interviju Svabodzie jon patłumačyŭ svaju inicyjatyvu nastupnym čynam:
Sam list — nia tolki ab tym, što treba jadnać praeŭrapiejskija siły, što treba mieć peŭnuju idealohiju — dla mianie heta praeŭrapiejskaja idealohija, što varta pravieści kanhres. Sam list źmiaščaje i sytuacyju ŭnutry krainy, pra adnosiny z EZ, z Rasiejaj — heta šyrokaje tłumačeńnie sytuacyi, bo vielmi šmat interpretataraŭ, a ja chacieŭ by naŭprost źviarnucca da ludziej sa svaimi dumkami.
Heta absalutna nie kanhres pad Milinkieviča, heta kanhres dla ŭzmacnieńnia dyskursu na temu «Eŭropa i my», naš hieapalityčny vybar.
Ja b chacieŭ, kab pra heta ŭ krainie jak maha bolš havaryli, nia tolki pa dziaržaŭnym telebačańni, nia tolki na palityčnych schodach i ŭ Internecie — ja chaču, kab kraina na kuchniach abmiarkoŭvała hetyja pytańni. Ad nastroju ŭ hramadztvie zaležyć naš los. Nia treba dumać, što tolki ŭłada vyrašaje, jak chutka my budziem demakratyzavacca i intehravacca ŭ Eŭropu — my heta vyrašajem taksama.
My pierad kanhresam źbirajemsia pravieści da 80 rajonnych schodaŭ, na jakich budziem usio heta abmiarkoŭvać — uvachod svabodny. I chočam na hetych schodach vyłučyć delehataŭ na kanhres. Toje, što my budziem rabić, nia zrobić ni ŭłada, ni Brusel, ni Vašynhton, ni Varšava, ni Vilnia. Paśla kanhresu pačniecca realnaja šyrokaja praca pa eŭrapieizacyi Biełarusi».
