Dyrektar Bresckaha muzyčnaha kaledža Aleh Roŭda sychodzić z zajmanaj pasady. Na prezidenckich vybarach, jakija prajšli ŭ žniŭni, jon byŭ staršynioj učastkovaj vybarčaj kamisii. Na jaho ŭčastku pieramahła Śviatłana Cichanoŭskaja, piša TUT.BY.
Fota: «Viačerni Brest»
Navinu ab kadravych pierastanoŭkach u administracyi muzyčnaha kaledža TUT.BY paviedamiła supracoŭnica ŭstanovy na ŭmovach ananimnaści. Pavodle jaje słoŭ, 30 listapada Aleh Piatrovič praviadzie svoj apošni pracoŭny dzień u kreśle dyrektara. Kaho pryznačać na jaho miesca — nieviadoma.
U hutarcy z TUT.BY dyrektar kaledža paćvierdziŭ infarmacyju ab svaim sychodzie.
— Sychodžu pa pahadnieńni bakoŭ, — paviedamiŭ dyrektar.
Pryčyny svajho rašeńnia Aleh Piatrovič nie nazvaŭ.
Na minułych prezidenckich vybarach Aleh Piatrovič byŭ staršynioj učastkovaj vybarčaj kamisii, jakaja raźmiaščałasia ŭ budynku muzyčnaha kaledža. 9 žniŭnia na hetym učastku adnym ź pieršych prahałasavaŭ staršynia Bresckaha abłvykankama Anatol Lis.
Fotazdymak pratakołu z kaledža jość na płatformie «Hołas». Zhodna z dakumientam, na ŭčastku pieramahła Śviatłana Cichanoŭskaja. Za jaje prahałasavaŭ 701 čałaviek. Na druhim miescy Alaksandr Łukašenka — 464 hałasoŭ.
Daviedacca pra pryčyny sychodu dyrektara žurnalisty pasprabavali ŭ načalnika ŭpraŭleńnia kultury Bresckaha abłvykankama Siarhieja Panasiuka. Adnak jon ad kamientaroŭ admoviŭsia.
Aleh Piatrovič uznačalvaŭ muzyčny kaledž bolš za dva hady. Da hetaha pracavaŭ dyrektaram škoły mastactvaŭ u Čarnaŭčycach. Pa słovach padnačalenych, za čas svajoj pracy ŭ kaledžy jon zrabiŭ šmat:
— Dyrektara chvalili, charaktaryzavali sa stanoŭčaha boku. Da 80-hodździa kaledža vydzielili hrošy, jon vyrašyŭ pytańnie z fartepijana, ukłaŭsia ŭ ramont. Bufiet u nas byŭ strašny, jon adramantavaŭ. I internat adkryli 1 vieraśnia hetaha hoda. Raniej nie było, — padzialiłasia z TUT.BY supracoŭnica ŭstanovy.
Aleh Roŭda za ŭdarnymi. Fota: Bresckaja fiłarmonija
Aleh Piatrovič usio svajo žyćcio źviazaŭ z muzykaj.
— Adnojčy ŭ trynaccatuju škołu, dzie ja vučyŭsia, pryjechała estradnaja hrupa pieršaj muzyčnaj škoły, u jakoj u toj čas hraŭ tahačasny školnik, a ciapier vialiki muzyka Ihar Karnialuk. Kali jany zajhrali, ja vyrašyŭ, što pavinien być ź imi i tolki ź imi, — raspaviadaŭ dyrektar muzkaledža ŭ intervju haziecie «Briestskij viestnik». — Na nastupny dzień maci adviała mianie ŭ muzyčnuju škołu, dzie ja staŭ zajmacca pa kłasie bajana. I ŭžo praź dziesiać hadoŭ, kali mnie spoŭniłasia 17, maja mara spraŭdziłasia — i my razam ź Iharam zajmalisia kancertnaj dziejnaściu ŭ haradach i vioskach Bresckaj vobłaści. Dla mianie muzyka — heta mahija. Ja prapuskaju praź siabie kožny huk, rastvarajusia ŭ miełodyi.
Akramia pracy ŭ kaledžy Aleh Piatrovič źjaŭlajecca mastackim kiraŭnikom i ŭdarnikam džazavaha ansambla Rich Sound Band.
