Fota Volhi Šukajła
Biełaruski partał Tut.by atrymaŭ Mižnarodnuju premiju imia Paŭła Šaramieta. Takoje rašeńnie pryniaŭ Kirujučy kamitet Forumu hramadzianskaj supolnaści Uschodniaha partniorstva.
Premijaj imia Šaramieta čaćviorty hod zapar uznaharodžvajuć za śmiełaść i addanaść žurnalisckim standartam pradstaŭnikoŭ ŚMI z krain — členaŭ Uschodniaha partniorstva. Premija budzie ŭručanaja Tut.by padčas 12-j štohadovaj Asamblei, jakaja projdzie 8 śniežnia ŭ Brusieli.
Uznaharoda nazvanaja ŭ honar zahinułaha ŭ lipieni 2016 hoda žurnalista Paŭła Šaramieta «ŭ znak pryznańnia jaho vydatnaha ŭkładu ŭ spravu prasoŭvańnia pytańniaŭ ab pravach čałavieka i svabody słova».
Nahadajem, što žurnalistka Tut.by Kaciaryna Barysievič była zatrymanaja 19 listapada kala svajho doma. Jana pisała artykuł pra Ramana Bandarenku. Spačatku Kaciaryna była ŭ SIZA KDB, potym jaje pieraviali ŭ SIZA na Vaładarskaha. Imavierna, što joj vystaŭlena abvinavačvańnie, ale z advakata ŭziali padpisku ab nierazhałašeńni.
Viadoma, što Hienprakuratura raniej raspačała kryminalnuju spravu pa fakcie vydavańnia miedycynskaj tajny, što paciahnuła ciažkija nastupstvy (č. 3 art. 178 KK). Havorka idzie pra stan zahinułaha Ramana Bandarenki. Kaciaryna była aŭtaram artykuła, dzie pakazvałasia, što ŭ jaho kryvi nie było ałkaholu. Svajaki Ramana pretenzij da ŚMI i miedpiersanału nie vykazvali, maci dała zhodu na raspaŭsiud infarmacyi ab stanie syna.
