Archiŭnaje fota. Mikita Jemialjanaŭ padčas sudu pa spravie ab napadzie na budynki Mienharsudu i SIZA na Vaładarskaha. Luty 2020 hodu.
16 śniežnia maci anarchista Mikity Jemialjanava Anastasija Jemialjanava atrymała ad syna list, adpraŭleny z turmy 7 śniežnia. «Zaŭtra idu ŭ ŠYZA», — napisaŭ maci Mikita Jemialjanaŭ. Žančyna nie vyklučaje, što syn i ciapier u karcary, piša Svaboda.
«Navat nia viedaju, na jaki termin Mikitu pakarali karcaram. Mahli dać 7 dzion, a mahli i ŭsie 10», — miarkuje Anastasija Jemialjanava. Dakładnaj pryčyny pakarańnia syna karcaram jana nia viedaje. «Apošni karcar, u listapadzie, byŭ za parušeńnie formy adzieńnia. Paśla hetaha Mikita napisaŭ, što jašče dvojčy atrymaŭ padobnyja zaŭvahi, ale za što dakładna ciapier pakarali — nieviadoma».
Anastasija Jemialjanava ličyć, što da jaje syna dadatkova čaplajucca praź jahonyja palityčnyja pohlady. «Miarkuju, pomściać za jahonuju pazycyju, presujuć nadzvyčaj žorstka, jak i inšych anarchistaŭ, a jon taki, što nie sastupaje. Vosieńniu dvojčy na znak pratestu admaŭlaŭsia ad ježy», — paviedamiła Svabodzie maci palitviaźnia Anastasija Jemialjanava. Abviaščaŭ syn haładavańnie ci heta byli razavyja admovy prymać ježu, Anastasija nia viedaje.
«Paviedamlać pra ŭmovy zabaroniena»
Anarchist Mikita Jemialjanaŭ adbyvaje 4 hady źniavoleńnia ŭ krytaj turmie ŭ Mahilovie, u jaho strohi režym utrymańnia. Što viadoma pra ŭmovy, u jakich znachodzicca Mikita Jemialjanaŭ?
«Pra ŭmovy im pisać zabaroniena. Navat pra sukamernikaŭ ničoha nielha pisać — z kim siadziš, jakija adnosiny. Na spatkańniach kazaŭ, što ŭ kamery ŭmovy narmalnyja. Byŭ ramont, vakno novaje — škłopakiet, u kamery ciopła. A pra karcar ničoha nia viedaju, akramia ahulnych źviestak, što ciaham dnia možna tolki siadzieć na łavie, łožak adkidvajecca tolki na noč. A sam jon pra karcar ničoha nia piša, na ŭmovy nia skardzicca — akramia taho, što abmiažoŭvajuć listavańnie», — raskazała Anastasija Jemialjanava.
Pavodle źviestak maci Mikity Jemialjanava, jamu nie pieradali častku listoŭ ad siabroŭ, u tym liku ad anarchista Źmitra Palijenki. Taksama nia ŭsie jahonyja listy dachodziać da adrasataŭ.
Kolery Santa-Kłaŭsa pad zabaronaj?
«Mikita ŭkłaŭ ŭ list da mianie paštoŭki Illu Vałaviku i Michaiłu Žamčužnamu. Sprabavaŭ padtrymać, bo daviedaŭsia, što ich pakarali karcaram. Ničoha asablivaha — prosta słovy maralnaj padtrymki. Ale tyja paštoŭki da mianie nie dajšli. Ich zabrali. Maŭlaŭ, listavańnie pamiž viaźniami zabaroniena. Toje samaje i ź listami jamu. Niadaŭna siabry adpravili jamu ŭ liście kaladnyja nalepki, dyk ich turemnaja cenzura zabrała», — raskazała Anastasija Jemialjanava. Jana miarkuje, što turemnym cenzaram nie spadabalisia bieł-čyrvona-biełyja kolery kaladnych nalepak.
«Tam u centry malunku Santa-Kłaŭs, a jaho ž adzieńnie nie čyrvona-zialonaje, a čyrvonaje ź biełym. Nu voś, peŭna, tamu i nie prapuścili», — miarkuje Anastasija Jemialjanava.
Mikita Jemialjanaŭ vučyŭsia na 3 kursie BNTU. Jaho zatrymali ŭ kastryčniku 2019 hodu pavodle padazreńnia ŭ napadach na budynak Mienskaha haradzkoha sudu i SIZA na Vaładarskaha. Svoj učynak Mikita Jemialjanaŭ nazvaŭ pratestam suprać pieraśledu palitviaźniaŭ.
U sakaviku 2020 hodu anarchist Mikita Jemialjanaŭ byŭ asudžany na 7 hadoŭ źniavoleńnia, u vyniku apelacyi pakarańnie źmienšyli da 4 hadoŭ. Spačatku Mikita Jemialjanaŭ adbyvaŭ termin u Babrujskaj kalonii, dzie jaho źmiaścili ŭ PKT — pamiaškańnie kamernaha typu, potym jak parušalnika režymu pieraviali ŭ Mahiloŭskuju krytuju turmu.
Pravaabaroncy Biełarusi pryznali anarchista Mikitu Jemialjanava palitviaźniem i damahajucca pierahladu jahonaj spravy.
