Fota ź instahrama Alaksandry Hierasimieni.
Alimpijskaj pryziorcy Alaksandry Hierasimienia praz palityčnuju situacyju daviałosia źjechać ź Biełarusi. Da adjezdu dla jaje škoły płavańnia nie padoŭžyli damovu arendy z tych ža pryčyn. Ciapier Alaksandra žyvie ŭ Vilni, uznačalvaje Biełaruski fond spartovaj salidarnaści.
— Ciažka było pakinuć siamju, muža. Dapamahło, peŭna, tolki toje, što ja šmat vandruju, tak što doŭhija rastavańni dla nas nie ŭpieršyniu, — kaža Alaksandra. — Składana, viadoma, navat było ŭjavić, što padziei ŭ Biełarusi vyljucca ŭ takija nastupstvy. Što mnie buduć pisać pahrozy datyčna maich vykazvańniaŭ, jašče da taho, jak ja ŭznačaliła fond. Ale ja ni pra što ni škaduju. Škaduju tolki pra toje, što my nie vystupili suprać niesumlennaści raniej, nie paŭstali ścianoj.
Hałoŭnym dasiahnieńniem pracy fondu na dadzieny momant Alaksandra jakraz ličyć uviadzieńnie sankcyj MAK suprać Nacyjanalnaha alimpijskaha kamiteta.
— Ale my taksama pracujem u poŭnuju moc datyčna skasavańnia ci pieranosu čempijanatu śvietu pa chakiei — 2021.
Alaksandra płanuje viarnucca ŭ Biełaruś, jak tolki źmienicca palityčnaja situacyja.
— Vieru, što praź miesiac-druhi ŭsio vyrašycca ŭ naš bok, u Biełarusi stanie spakajniej, projduć novyja vybary, pa zakonie, usie vinavatyja buduć pakaranyja. A spartoŭcy narešcie zmohuć spakojna rychtavacca da blizkich startaŭ i spabornictvaŭ, niezaležna ad ich palityčnych pohladaŭ i pazicyi. Ja aktyŭna ŭklučusia va ŭsie hetyja pracesy na radzimie.
