Tydzień tamu stała viadoma pra ŭlotki, jakija nieviadomyja raskleili na damach homielskich aktyvistaŭ i vałancioraŭ. Tak haradžan, jakija adkryta kažuć ab svajoj hramadzianskaj pazicyi, pasprabavali ačarnić. Charakternyja ŭlotki «U vašym domie žyvie abličča pratestu» źjaŭlajucca na damach i dalej, ciapier užo z novymi hierojami, pišuć «Mocnyja naviny».
Jak i na minułym tydni, kali pad fota byli abvinavačvańni ŭ zdradach, parušeńni PDR, raspaŭsiudzie BČB-atrybutyki, na ŭlotkach — nibyta vykryćcio aktyvistaŭ. Adny, pišuć, «siadziać na šyi ŭ baćkoŭ», adbyli termin, pra inšych — «dapuskajuć rukaprykładstva ŭ dačynieńni da dziaciej», a chtości prosta «zaachvociŭsia da zmaharstva».
«Mocnym navinam» dasłali fatahrafii ŭlotak ź infarmacyjaj jak minimum pra 15 hamielčukoŭ. Adna ź dziaŭčat, čyje zdymki raźviesili pa słupach i padjezdach, źviazałasia z redakcyjaj. Dziaŭčynu zavuć Alina (imia źmieniena pa prośbie hieraini).
— Na pazaminułym tydni ludziej vyklikali ŭ RAUS na hutarku — nichto nie pradstaŭlaŭsia. Prasili prajści palihraf, pakul išła pravierka vynikaŭ, na mianie cisnuli za toje, što ja ŭdzielničaju ŭ akcyjach, fatahrafujusia z BČB-ściahami. Sprabavali pahražać, što majho maładoha čałavieka vyklučać z univiersiteta. Ja praviała ŭ Savieckim RAUS 3 ci 4 hadziny, palihraf projdzieny, podpis moj staić, ale pry hetym niama navat pozvy. A ciapier usich pačynajuć ckavać ulotkami.
Alina kaža, što ŭ RAUS pytalisia i pra jaje znajomaha, cikavilisia, ci ŭžyvaje chłopiec ałkahol. A potym źjaviłasia ŭlotka ź jaho fota…
— Pisali, što jon pje bahata, choć čałaviek naohuł niepituščy. Idzie poŭny paklop. Na adnoj z maich ulotak chtości padpisaŭ čyrvonym markieram numar kryminalnaha artykuła za paklop. Adnaho chłopca, fota jakoha visieła, zatrymali, u jaho pavinien byŭ być sud u pačatku tydnia.
Pra samu Alinu napisali, što jana «akazvaje seksualnyja pasłuhi, vykładvaje ŭ sacyjalnych sietkach intymnyja fota». Jaje, jak i inšych aktyvistak, taksama abvinavacili ŭ zdradach.
— Pryjemnaha, viadoma, mała. Heta vielmi niepryjemna, tym bolš ja pracuju ź ludźmi, a infarmacyja jość usiudy: i «UKantakcie», i ŭ telehramie. Usiudy paskardzicca niemahčyma. Usio raspaŭsiudžvajecca pavoli pa ŭsim horadzie. «UKantakcie» ŭžo pačali dadavacca roznyja mužčyny. Viadoma, ja adčuvaju siabie ŭ niebiaśpiecy.
Napisana tryźnieńnie. U mianie była kryminalnaja sudzimaść, ale ŭ 2017-m i anulavanaja. Ja ŭpeŭnienaja, što heta robić milicyja, tamu što pašpartnyja fatahrafii, jakija na ŭlotkach, jość tolki ŭ MUS. Zbolšaha tam jość materyjały spravy, ale «pieraviernutyja», jak im zručna. Atrymlivajecca, heta raspaŭsiudžvańnie materyjałaŭ spravy, jana anulavanaja i nidzie nie pavinna publikavacca.
Jašče ŭ RAUS, adznačaje hamialčanka, na jaje sprabavali «nacisnuć» hetaj sudzimaściu.
— Ale mnie było što pradjavić u adkaz. Letaś mianie źbili pad domam. Była niejkaja pjanaja bojka. Kali viartałasia dadomu, na mianie napała dziaŭčyna, udaryła pa hałavie, ja ŭpała na žvir. Straciła prytomnaść, mianie źbivali na praciahu paŭhadziny, pakul jechała milicyja. U mianie było strasieńnie mozhu. Milicyja tak nikoha i nie znajšła.
Takija ž ulotki paviesili i na chacie maładoha čałavieka Aliny. Dziaŭčyna kaža, heta stres dla jaho baćkoŭ. Alina płanuje źviazacca z advakatam i pryciahnuć da adkaznaści tych, chto raspaŭsiudžvaje infarmacyju. Kaža, z tych, kaho jana viedaje i chto ŭbačyŭ siabie na ŭlotcy, usie źbirajucca padavać zajavy za paklop.
Znajšoŭ kala doma ŭlotki sa svaim fota i aktyvist, vałancior Illa Mironaŭ. Mužčyna kaža, što raskleili ich pa ŭsim rajonie i navat dabralisia da Vałatavy. Mironaŭ maje namier napisać zajavu ŭ milicyju, kab vinavataha znajšli i pakarali.
