25 śniežnia Rastvo Chrystovaje adznačajuć kataliki, pratestanty, unijaty i častka pravasłaŭnych. Tradycyjna ŭ noč na 25 śniežnia na telekanale «Biełaruś-1» tranślujecca śviatočnaja imša z adnaho z kaściołaŭ, a ranicaj da viernikaŭ źviartajecca mitrapalit Minska-Mahiloŭski archidyjacezii Tadevuš Kandrusievič.
Adnak sioleta hledačy zaŭvažyli ŭ prahramie pieradač źmieny. Rankam da viernikaŭ źvierniecca pravasłaŭny ijerarch, mitrapalit Minski i Zasłaŭski Vienijamin. Aficyjnaja nahoda — dzień pamiaci śviaciciela Śpirydona.
Pres-sakratar Kanfierencyi katalickich biskupaŭ u Biełarusi ksiondz Juryj Sańko navat uśmichnuŭsia, kali pačuŭ pytańnie.
«A vy nie viedajecie čamu? Niama mitrapalita — niama zvarotu», — kaža jon.
Tadevuš Kandrusievič ad vieraśnia nie moža viarnucca ŭ Biełaruś. Ułady admaŭlajuć jamu va ŭjeździe ŭ krainu, nibyta praz toje, što ŭ śviatara jość druhoje hramadzianstva, praŭda, dokazaŭ hetamu pradstaŭlena tak i nie było. Mnohija źviazvajuć cisk na Kandrusieviča z tym, što jon u dni paśla vybaraŭ nie chavaŭ svaju pazicyju.
«NN» pacikaviłasia, čamu da viernikaŭ u takim vypadku nie źvierniecca dapamožny biskup Juryj Kasabucki? «Kali rychtavałasia tranślacyja śviatočnaj imšy, to nam było daviedziena, što jaje moža pravodzić chto zaŭhodna, ale nie biskup Kasabucki».
Śviatočnaja imša sioleta budzie tranślavacca z Mahilova, a pravodzić jaje budzie biskup Alaksandr Jašeŭski.
Atrymać kamientar pres-słužby «Biełaruś-1» z hetaj nahody pakul nie atrymałasia.
