Konkurs «Ciurkbačańnie» byŭ stvorany ŭ Turcyi ŭ piku Jeŭrabačańniu dla śpievakoŭ ź ciurkskich krain abo «ciurkskaha pachodžańnia z krain, dzie značnaja častka nasielnictva razmaŭlaje na ciurkskich movach». Upieršyniu konkurs adbyŭsia ŭ Stambule ŭ 2013 hodzie, usiaho tady brali ŭdzieł 12 krain, u tym liku Biełaruś u asobie Hiuneš — choć nie skazać, što i ŭ Biełarusi šmat chto havoryć na ciurkskich movach, bo biełaruskija tatary biełaruskamoŭnyja.
Z 2016 hoda konkurs padvis paśla sproby pieravarotu ŭ Turcyi, zatoje sioleta prajšoŭ vialikapyšna. Było 26 udzielnikaŭ. Siarod ich — hahauzy Małdovy, turkmieny Iraka, a ad Rasii — asobny ŭdzielnik ad Chakasii, asobny — ad Jakucii Sacha, asobnyja — ad nahajcaŭ, Tatarstana, Baškartastana, Tuvy i Maskvy. Aŭtanomii Rasii śpiavali pad dvuma ściahami: svaim nacyjanalnym i rasijskim.
Była reprezientavanaja i Biełaruś. Niepadobna, kab śpiavačka Śviatłana Aharvał mieła ŭ svaich žyłach šmat ciurkskaj kryvi, ale muž u jaje indyjec i śpiavaje jana na chindzi. Tut ža joj daviałosia śpiavać na azierbajdžanskaj, ale zrabiła heta jana taksama ŭ indyjskim styli. Pieśnia nazyvajecca «Zrazumiej mianie».
Aŭtaram kampazicyi stała śpiavačka Hiuneš, jakaja na pieršym Ciurkbačańni zaniała druhoje miesca.
Sioleta hałoŭnuju ŭznaharodu konkursu ŭziała pasłanka Ukrainy hahauzka Natali Papazahłu, a Śviatłana Aharvał apynułasia na 23 miescy z 26 mahčymych.
Nastupny vypusk Ciurkbačańnia maje adbycca ŭ Nahornym Karabachu, u Šušy, niadaŭna viernutaj pad kantrol Azierbajdžana z dapamohaj tureckaj zbroi — tema honaru Redžepa Erdahana, jaki bačyć siabie budaŭnikom i lidaram «ciurkskaha śvietu».
A voś jak hučyć kłasičny pop ź Jakucii Sacha:
