Homielskamu hramadskamu aktyvistu Uładzimiru Niapomniaščych vystavili abvinavačvańnie za publičnuju abrazu prakurora (artykuł 369 Kryminalnaha kodeksa). 68-hadovaha aktyvista abvinavačvajuć u abrazie pamočnicy prakurora Homiela Alesi Žuraŭskaj u zale suda. Paśla abviaščeńnia prysudu 26 listapada Hieorhiju Vasilenku za padniaty na fłahštoku bieł-čyrvona-bieły ściah na homielskaj płoščy, dzie Žuraŭskaja padtrymlivała dziaržabvinavačvańnie, aktyvist skazaŭ: «Arhanizavanaja złačynnaja hrupa». Uładzimir Niapomniaščych viny nie pryznaje i zajaŭlaje, što hety vyraz mieŭ dačynieńnie da abvieščanaha kryminalnaha prysudu. Aktyvist źmieščany ŭ SIZA Homiela. Pra heta paviedamlaje «Homielskaja viasna».
23 śniežnia ŭ kvatery palityčnaha aktyvista Uładzimira Niapomniaščych prajšoŭ vobšuk, paśla jakoha jaho zatrymali na 72 hadziny. Ale tady było viadoma, što ŭ dačynieńni da jaho ŭzbudžanaja kryminalnaja sprava pa art. 366 Kryminalnaha kodeksa (Pahrozy ci hvałt u dačynieńni da słužbovaj asoby pry vykanańni).
«Ja nikomu nie pahražaŭ. Kali Vasilenku sudzili za zamienu dziaržaŭnaha ściaha na płoščy, paśla prysudu ja skazaŭ, što adkaznaść za heta buduć nieści ŭsie», — kamientavaŭ da aryštu svaje słovy 68-hadovy hamialčuk.
Aryšt i źmiaščeńnie da suda ŭ SIZA 68-hadovaha mužčyny pravaabaronca «Viasny» Leanid Sudalenka nazyvaje «pomstaj» z boku prakuratury, jakaja źjaŭlajecca nieadekvatnaj i surovaj u adnosinach da zroblenaha.
«Kryminalny kodeks pradstaŭnikoŭ ułady vyłučaje ŭ asobnuju katehoryju ludziej. U vypadku abrazy zvyčajnaha čałavieka jon pavinien źviarnucca ŭ sud i abaraniać siabie ŭ ramkach hramadzianskaha sudavodstva. Paroh krytyki čynoŭnikaŭ vyšejšy — kryminalnaja adkaznaść. Usie pavinny być roŭnyja pierad zakonam, u niezaležnaści ad zajmanych pasad», — prakamientavaŭ spravu aktyvista Sudalenka.
Sankcyja artykuła 369 Kryminalnaha kodeksa praduhledžvaje pakarańnie da troch hadoŭ abmiežavańnia voli.
