Siońnia ŭ sudzie Maskoŭskaha rajona Bresta adbyŭsia paŭtorny razhlad "Spravy časopisa ARCHE"».
Na prośbu pazoŭnika - upraŭleńnia KDB pa Brecskaj vobłaści - sud papiarednie pieraniesieny na 25 červienia (14:00).
Pazoŭnik paprasiŭ pravieści ekśpiertyzu artykułaŭ, źmieščanych u №7‑8'2008 ARCHE, na pradmiet utrymańnia ŭ im materyjałaŭ ekstremicskaha źmiestu Instytutam nacyjanalnaj biaśpieki i Infarmacyjna‑analityčnym centram pry Administracyi prezidenta.
Sud zadavoliŭ chadajnictva. "Narešcie zroblena toje, što musiła być zroblena na samym pačatku, — kaža hałoŭny redaktar ARCHE Valer Bułhakaŭ. — Praŭda, my nie bačyli, jak sfarmulavany list u dźvie hetyja ŭstanovy. Pradstaŭnik KDB, jaki prysutničaŭ na sudzie, jaho nie pradstaviŭ". Advakat Pavał Sapiełka usumniŭsia, ci ŭvohule Instytut nacyjanalnaj biaśpieki i Infarmacyjna‑analityčny centr pry Administracyi prezidenta pravamocnyja rabić takija ekśpiertyzy.
Pasiedžańnie prachodziła ŭ zakrytym režymie. Heta było matyvavana tym, što na pracesie "zakranajucca intaresy biełaruskaj dziaržavy".
***
Nahadajem, što 7 maja ŭ abłasnym sudzie Bresta adbyŭsia razhlad kasacyjnaj skarhi na rašeńnie suda Maskoŭskaha rajona Bresta ab pryznańni šerahu publikacyj u № 7—8 niedziaržaŭnaha intelektualnaha časopisa «Arche» «ekstremisckimi materyjałami, jakija padlahajuć źniščeńniu». Sprava tady była viernuta na paŭtorny razhlad u sud Maskoŭskaha rajona Bresta.
25 lutaha sudździa Maskoŭskaha rajona Bresta Taćciana Miraniuk zadavoliła zajavu upraŭleńnia KDB pa Bresckaj vobłaści ad 30 śniežnia 2008 h. ab pryznańni vydańnia ekstremisckim.
«…Praviedzienym analizam ustanoŭlena, što ŭ časopisach utrymlivajucca źviestki, jakija dyskredytujuć dziejnaść orhanaŭ ułady i kiravańnia Respubliki Biełaruś, uzmacniajuć sacyjalna‑palityčnuju napružanaść i supraćstajańnie ŭ hramadstvie, stymulujuć ździajśnieńnie dziejańniaŭ, nakiravanych na arhanizacyju i ažyćciaŭleńnie masavych biesparadkaŭ, i tym samym stvarajuć pahrozu biaśpiecy Respubliki Biełaruś», — śćviardžałasia ŭ zajavie za podpisam načalnika UKDB, pałkoŭnika Leanida Dziadkova. Mielisia na ŭvazie artykuły palitołahaŭ, pryśviečanyja palityčnaj situacyi ŭ Biełarusi i vybaram 2008 hodu.
