Prajšli pierarehistracyju paśla ŭstupleńnia ŭ siłu novaha Zakona ab srodkach masavaj infarmacyi. Šerah niezaležnych vydańniaŭ dahetul znachodziacca pa-za dziaržaŭnaj sistemaj raspaŭsiudu.
Novy zakon ab ŚMI, u adpaviednaści ź jakim usie srodki masavaj infarmacyi pavinny prajści pierarehistracyju na praciahu hoda, ustupiŭ u siłu z 8 lutaha 2009 hoda. Pa stanie na 8 lutaha ŭ Biełarusi ŭsiaho naličvałasia 1 tys. 314 ŚMI, u tym liku 663 haziety, 594 časopisy, 42 biuleteni, 6 katałohaŭ, 9 infarmacyjnych ahienctvaŭ.
Amal za 4 miesiacy, što prajšli z momantu ŭstupleńnia ŭ siłu zakona, pierarehistravalisia 315 vydańniaŭ, 1 infarmacyjnaje ahienctva, paviedamlaje BIEŁTA. Akramia 306 haziet i časopisaŭ heta 6 biuleteniaŭ, 2 katałohi, 1 infarmacyjnaje ahienctva.
Byli zarehistravanyja 62 novyja srodki masavaj infarmacyi — 28 haziet (27 niedziaržaŭnych), i 34 časopisy, taksama niedziaržaŭnyja.
Akramia taho, prajšli pierarehistracyju 13 radyjoprahram i 16 teleprahram. Na momant ustupleńnia ŭ siłu «Zakona ab ŚMI» isnavała 158 radyjoprahram i 71 teleprahrama. Zarehistravanyja 2 novyja radyjoprahramy i 4 teleprahramy.
Varta adznačyć, što bolš za dziesiatak niedziaržaŭnych vydańniaŭ, pieravažna rehijanalnych, dahetul zastajucca pa-za dziaržaŭnaj sistemaj raspaŭsiudu. Redakcyi «Babrujskaha kurjeru», «Volnaha Hłybokaha», «Haziety Słonimskaj», «Intex-press» dy inšych haziet čakajuć stanoŭčaha adkazu ad kiraŭnictva Biełsajuzdruku i Biełpošty. Nie atrymaŭ akredytacyi pry MZS i pieršy niezaležny spadarožnikavy telekanał «Biełsat».
