Fota https://e-finland.ru
Ahienctva pa mižnarodnym handli i inviestycyjach zabiaśpiečyć 15 pieramožcam supravadžeńnie z aeraporta, kulturnuju padrychtoŭku, umovy dla dystancyjnaj pracy i ŭsiu dakumientacyju, nieabchodnuju dla trochmiesiačnaha pražyvańnia ŭ krainie. Taksama zamiežniki atrymajuć žytło, a ich dziaciej adpraviać u sadok ci škołu. Vydatki na avijapieralot i pražyćcio nie praduhledžanyja, ale ŭ vypadku paśpiachovaha testavaha pieryjadu jość mahčymaść atrymać materyjalnuju dapamohu padčas padačy dakumientaŭ na pastajannaje miesca žycharstva, piša BBC.
Ali Otarsan, adzin ź pieramožcaŭ prahramy, jaki zajmajecca inviestycyjami ŭ videahulni, kaža, što padaŭ zajaŭku, bo byŭ zaniepakojeny ličbami vypadkaŭ karanavirusa ŭ Łos-Andželesie, adkul jon rodam. Jon płanuje vykarystać prahramu, kab vyvučyć novyja inviestycyjnyja mahčymaści ŭ industryi hulniaŭ u Chielsinki i nabyć novyja kantakty ŭ adnym z najmienš paciarpiełych ad kavidu haradoŭ Jeŭropy.
«Maja niaviesta taksama zajmajecca biznesam, tamu my razhladajem prahramu jak mahčymaść pašyryć svaju sietku ŭ Finlandyi, a taksama vyrvacca sa zvykłaha sacyjalnaha koła i paznajomicca z novymi ludźmi», — śćviardžaje Ali Otarsan.
Inicyjatyva Finlandyi vyklikała šmat uvahi za apošnija tydni va ŭsim śviecie. Choć było abrana tolki 15 pieramožcaŭ, arhanizatary prahramy spadziajucca, što rekłama hetaj inicyjatyvy dapamoža pryvabić jašče bolš talenavitych ludziej, kab zapoŭnić niedachop kadraŭ u vysokatechnałahičnym siektary ekanomiki. Kali heta spracuje, padobnyja prahramy pierasialeńnia mohuć stać kaštoŭnym instrumientam u kankurentnaj baraćbie za zamiežnych prafiesijanałaŭ.
Finlandyja dała śvietu apieracyjnuju sistemu Linux, telekamunikacyjnaha hihanta Nokia, a taksama technałohiju SMS, jakaja zabiaśpiečvaje abmien tekstavymi paviedamleńniami. Tym nie mienš, popyt na technałohii raście, a kvalifikavanaj pracoŭnaj siły ŭ Finlandyi brakuje.
«U nas cudoŭnaja školnaja sistema, my rychtujem šmat inžynieraŭ i prahramistaŭ, ale popyt nastolki vialiki, što i hetaha niedastatkova», — kaža Jochana Chuure z Helsinki Business Hub. «Akramia hetaha, my nie dumajem, što ŭsie vialikija rozumy skancentravanyja ŭ Finlandyi. Najaŭnaść zamiežnych talentaŭ dapamoža našym idejam raspaŭsiudzicca na ŭvieś śviet».
Chielsinki, pa hłabalnych mierkach, horad mały — u im žyvie mienš za miljon čałaviek, a ŭsiaho ŭ Finlandyi — tolki 6 miljonaŭ čałaviek. Zhodna z apošnim Hłabalnym indeksam kankurentazdolnaści talentaŭ, horad zajmaje 31 miesca ŭ śviecie. Chielsinki — horad ź nievialikim hłabalnym upłyvam, małym turystyčnym patokam i mienšaj kolkaściu štab-kvater transnacyjanalnych karparacyj.
Jonas Chała, staršynia adździeła pavyšeńnia kvalifikacyi ŭ Business Finland adznačaje, što najbolš zapatrabavanyja ŭ Finlandyi śpiecyjalisty z halin kibierbiaśpieki, kaśmičnych technałohij, technałohij achovy zdaroŭja, videahulniaŭ i kvantavych vyličeńniaŭ. Tyja, chto šukaje pracu, naprykład, u śfiery źviestak i analityki abo raspracoŭki prahramnaha zabieśpiačeńnia, mohuć raźličvać na zarobak €4113 štomiesiac (kala 13 tysiač biełaruskich rubloŭ).
Arhanizatary prahramy byli pryjemna ździŭleny kolkaściu zajavak na prahramu ad talenavitych kandydataŭ z usiaho śvietu. 30% kandydataŭ byli z Paŭnočnaj Amieryki, a astatnija — ź inšych kantynientaŭ. Bolšaść (70%) pracujuć dystancyjna, 16% źjaŭlajucca pradprymalnikami, a 12% šukali pracu niepasredna ŭ Chielsinki. Było taksama 60 inviestaraŭ.
Helsinki Business Hub stvaryŭ bazu dadzienych, dzie ŭsio kandydaty mohuć raźmiaščać svaje profili dla miascovych pracadaŭcaŭ. Kančatkovaja meta prahramy nie ŭ tym, kab pryvabić 15 vysokaadukavanych čałaviek. Chielsinki žadaje, kab jak maha bolš kvalifikavanych kandydataŭ daviedalisia pra Finlandyju i pabačyli, jak vyhadna i kamfortna pracujecca tam.
Choć prahrama była adkrytaj dla ŭsich hramadzian, arhanizatary nie ŭtojvali, što chacieli pryvabić jak maha bolš kandydataŭ z ZŠA, jakija, mahčyma, zaniepakojenyja situacyjaj z pandemijaj u krainie i palityčnymi chvalavańniami. Staŭka była zroblena na skandynaŭskuju sistemu sacyjalnaha zabieśpiačeńnia, kab pierakanać rabotnikaŭ z soniečnych miescaŭ, takich jak Kalifornija, pierajechać u Finlandyju.
«Vidavočna, što kali vy chočacie tolki soniečnaha nadvorja, Finlandyja nie budzie dla vas idealnym miescam, ale kali vy lubicie ŭsie 4 siezony, a taksama chočacie žyć u hramadstvie, dzie ŭsio cudoŭna funkcyjanuje, Finlandyja — vydatny varyjant», - pierakonvajuć stvaralniki prahramy.
«Što datyčycca nas, my chočam zachavać našu skandynaŭskuju madel sacyjalnaj abaronienaści dla ŭsich, a dla hetaha nam patrebny talenty i inviestycyi».
Charynder Jasval, śpiecyjalistka pa bijachimii z ZŠA, pierajechała ŭ Finlandyju ŭ 2019 hodzie. Pa jaje słovach, pierajezd prajšoŭ dobra, ale byli svaje prablemy. Pryjšłosia pryvykać da nizkich tempieratur, a taksama da mientalitetu finaŭ. Žychary Finlandyi nie takija ekstravierty, jak amierykancy, jany cišejšyja i šanujuć svaju asabistuju prastoru.
Fielipe Mantejra z francuzskaj biznes-škoły Insead adznačaje, što prahrama Finlandyi — prykład taho, jak možna myślić niestandartna, kab kankuravać z takimi haradami, jak Łondan, Sinhapur i San-Francyska.
Nahadajem, što Finlandyja — heta kraina z chałodnym klimatam, ale vysokim uzroŭniem ekanamičnaha raźvićcia. Jana abaraniła niezaležnaść ad SSSR u kryvavaj vajnie 1939—1940 hoda i zbudavała vysokaefiektyŭnuju ekanomiku. Pierad Druhoj suśvietnaj vajnoj jana stajała na adnym uzroŭni raźvićcia z Estonijaj. Praz 40 hadoŭ akupavanaja savietami Estonija ŭžo bieznadziejna adstavała. U pieryjad Chałodnaj vajny finy zajmali paśladoŭna niejtralnuju, aściarožnuju pazicyju. Ciapier Finlandyja — u Jeŭrasajuzie, ale nie rašajecca ŭstupić u NATA z bojazi, što Rasija pačnie pomścić.
