Fota Nastaśsi Utkinaj.
Sudovaje raźbiralnictva viadzie sudździa Ludmiła Piatrova i dva narodnyja zasiadacieli — Dukava i Matviejeva. Dziaržaŭny abvinavaŭca — Siarhiej Kavalčuk. Abvinavačvanaha abaraniaje advakat Alaksiej Kryvałapaŭ. Paciarpiełych pa dadzienaj spravie niama.
Ivana Viarbickaha abvinavačvajuć pa čatyroch artykułach Kryminalnaha kodeksa:
- Častka 5 artykuła 16 «Saŭdzieł u złačynstvie».
- Častka 1 artykuła 289 «Akt teraryzmu». Karajecca pazbaŭleńniem voli na termin ad vaśmi da piatnaccaci hod.
- Častka 2 artykuła 295 «Niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ». Karajecca papraŭčymi pracami na termin da dvuch hod, albo aryštam, albo abmiežavańniem voli na termin da piaci hod, albo abmiežavańniem voli na termin da siami hod sa štrafam ci biez štrafu.
- Častka 1 artykuła 377 «Kradziež, źniščeńnie, paškodžańnie abo ŭtojvańnie dakumientaŭ, štampaŭ, piačatak, kradziež błankaŭ». Karajecca hramadskimi pracami, ci štrafam, albo papraŭčymi pracami na termin da dvuch hod, albo aryštam, albo abmiežavańniem voli na termin da dvuch hod, albo pazbaŭleńniem voli na toj ža termin.
Zhodna z abvinavačvańniem, 14 kastryčnika 2020 hoda Ivan Viarbicki pad nikam «Dimon D» raźmiaściŭ u dvuch telehram-kanałach Ašmianaŭ i Astraŭca kamientary, u jakich zastrašvaŭ nasielnictva i destabilizavaŭ abstanoŭku ŭ krainie. U telehram-kanale «Ašmiany» zaklikaŭ zakidać prakuraturu Ašmianskaha rajona kaktejlami Mołatava, a ŭ telehram-kanale «Astraviec dla žyćcia» zaklikaŭ paškodzić majomaść supracoŭnikaŭ orhanaŭ unutranych spraŭ i ich siamiej. Abvinavačvańnie traktuje raźmiaščeńnie kamientaroŭ u publičnych telehram-kanałach jak padbuchtorvańnie da ździajśnieńnia aktu teraryzmu. Viarbickaha abvinavačvajuć jašče ŭ tym, što 21 kastryčnika jon razarvaŭ pratakoł ab pieratrusie, a taksama ŭ niezakonnym nabyćci i zachoŭvańni bojeprypasaŭ i vybuchovych rečyvaŭ.
Viarbicki pryznaje vinu tolki pa artykule 377.
Pakazańni Viarbickaha
Ivan Viarbicki naradziŭsia ŭ Bahdanavie ŭ Vałožynskim rajonie 17 lipienia 1965 hoda. Paśla žyŭ u Halšanach Ašmianskaha rajona, dzie aficyjna zarehistravany, ale pracavaŭ ad 1990-ch hadoŭ u Rasii. U jaho dźvie vyšejšyja adukacyi. Pracavaŭ mastakom-dyzajnieram, zatym pierakvalifikavaŭsia i pracavaŭ multyplikataram, režysioram, mantažoram videa. Maluje karciny, piša apaviadańni. Raniej nie byŭ sudzimy.
Viarbicki pryjechaŭ z Padmaskoŭja ŭ Halšany ŭ krasaviku 2020 hoda. U Halšanach Viarbicki žyŭ u domie baćki, jaki pamior piać hod tamu. Dom dastaŭsia ŭ spadčynu jamu i jaho siastry, adnak jany jašče nie dzialili majomaść.
14 kastryčnika Viarbicki pračnuŭsia kala 9 hadzin, adkryŭ telehram. U kanale «Ašmiany» pabačyŭ paviedamleńnie pra toje, što raźmiaścili adfotašoplenuju karcinku ściaha, kab pradstaŭniki pravaachoŭnych orhanaŭ pryjechali na miesca, a tam nasamreč ničoha nie było. Tamu abvinavačvany vyrašyŭ taksama «patrolić» siłavikoŭ. Jon pakinuŭ u kanale dopis sa słovami «Zaŭtra idziom šturmavać miascovy KDB», paśla dapisaŭ «Maleńkimi hrupami z kaktejlami Mołatava». Jamu adkazali, što ŭ Ašmianach ciapier niama KDB, na hetym miescy znachodzicca prakuratura. Tady Viarbicki adkazaŭ: «Budziem palić prakuraturu».
Paśla Viarbicki pierajšoŭ u kanał «Astraviec dla žyćcia», tam zrabiŭ repost z telehram-kanała, jaki pryznany ekstremisckim, i dapisaŭ: «Usie milicejskija tački i tački ich žonak pavinny hareć».
Abvinavačvany patłumačyŭ, što treba razumieć miažu pamiž rečaisnaściu i virtualnym žyćciom. Pa jaho słovach, dyskusija ŭ telehram-kanałach była absalutna žartoŭnaj i nie mieła dačynieńnia da realnaha žyćcia. Viarbicki pryznaŭsia, što časta zajmaŭsia trolinham:
— U adnym z telehram-čataŭ, napeŭna, heta byŭ kanał «Lida dla žyćcia» napisaŭ, što treba zrabić demanstracyju: vypuścić karoŭ, razmalavanych u biełyja i čyrvonyja kolery. Kaniešnie, hetaha nie adbyłosia. Jašče pisaŭ, što zrabiŭ padkop z Halšanaŭ da rezidencyi prezidenta. Ale stamiŭsia, a zastałosia ŭsiaho 200-300 mietraŭ dakapać, tamu zaklikaŭ ludziej mnie dapamahčy. Voś u žartoŭnaj formie pisaŭ, ale tady spravu nie ŭzbudzili.
Abvinavačvany nie viedaŭ, dzie znachodzicca prakuratura ŭ Ašmianach, a dakładnaha miesca dla zboru ludziej maleńkimi hrupami nidzie nie ŭkazvaŭ. Viarbicki nie byŭ znajomy ni z kim asabista z čataŭ «Ašmiany» i «Astraviec dla žyćcia». Taksama jon admaŭlaje, što padbuchtorvaŭ ludziej da terarystyčnaha aktu, nijakich dziejańniaŭ dla ździajśnieńnia złačynstva nie pradprymaŭ.
21 kastryčnika Viarbicki vyjšaŭ pa pradukty. Paśla viartaŭsia dadomu i pabačyŭ hrupu asob. Siarod hetaj hrupy ludziej byŭ čałaviek u milicejskaj formie, pobač stajała milicejskaja mašyna. Ludzi pakazali jamu paśviedčańni.
— Padumaŭ spačatku, što heta žart, rozyhryš. Tolki paśla zrazumieŭ, što heta sapraŭdy supracoŭniki. Adzin pakazaŭ pastanovu prakurora, dzie mianie abvinavačvajuć pa niejkich žachlivych artykułach.
Viarbicki pračytaŭ adnu staronku pastanovy, razzłavaŭsia i razarvaŭ dakumient. Kali jaho źbiralisia pavieźci ŭ pastarunak, dastaŭ telefon i raźbiŭ ab bahažnik milicejskaha aŭtamabila.
— Raźbiŭ telefon, tamu što pradstaviŭsia taki vypadak. Pryjechała śledčaja hrupa, jakaja pryjšła łavić złoha terarysta, — tłumačyŭ svaje dziejańni Viarbicki.
Milicyjaniery advieźli Viarbickaha ŭ pastarunak, zrabili novuju pastanovu i viarnulisia ŭ Halšany. Tam Viarbicki admaŭlaŭsia adčyniać dźviery domu pakul nie pryjšoŭ staršynia sielvykankama.
Doma ŭ abvinavačvanaha śledčaja hrupa znajšła porach i 23 małakalibiernyja patrony. Viarbicki raskazaŭ, što dom vialiki — šmat pakojaŭ, u jakich jon nie žyŭ, nie čapaŭ rečy, što zastalisia paśla śmierci baćkoŭ, i nie viedaje dakładna, što i dzie zachoŭvałasia.
Porach, jaki znajšli ŭ šafie, znachodziŭsia za bankami, jon tudy nie załaziŭ. A patrony lažali ŭ čamadanie, jaki znachodziŭsia ŭ kanapie ŭ pakoi maci, kudy jon vielmi redka zachodziŭ. Viarbicki miarkuje, što porach i patrony zastalisia ad baćki, jaki byŭ palaŭničym. Darečy, sam Viarbicki taksama byŭ palaŭničym, jon zdaŭ svaju strelbu ŭ milicyju na ŭtylizacyju jašče ŭ 2019 hodzie.
Śviedki z Ašmianskaha RAUS
Mikałaj Viarbicki, Ihar Jakaŭleŭ, Alaksiej Jaraševič — opierupaŭnavažanyja Ašmianskaha RAUS. Jany pravodzili pieratrus u abvinavačvanaha. Jakaŭleŭ i Jaraševič zajavili, što pierad tym, jak razarvać papieru ab pieratrusie abvinavačvany skazaŭ niešta pra karnikaŭ. Jaraševič pracytavaŭ: «Vy — karniki, vy nie dziejnaja zakanadaŭčaja ŭłada». Supracoŭniki milicyi paćvierdzili, što znajšli doma ŭ Viarbickaha porach i patrony, a taksama zabrali kampjutarnuju techniku.
Alaksandr Hudzieŭski — učastkovy Ašmianskaha RAUS. Jon taksama pravodziŭ pieratrus. Pa jaho słovach, bolš zajmaŭsia videazdymkaj, čym vyjemkaj rečaŭ, tamu nie viedaje, dzie dakładna znajšli porach i patrony.
Andrej Stelmach — staršy inśpiektar pa dazvolnaj pracy Ašmianskaha RAUS. Jon nie prymaŭ udziełu ŭ pieratrusie. Stelmach raskazaŭ, što Viarbicki zdavaŭ strelbu ŭ 2019 hodzie jamu.
