Michaił Biedunkievič, mvd.gov.by
Sudździa Ała Bušava pakarała jaho 1,5 hadami abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Mienavita stolki prasiŭ prakuror Papkoŭ.
Taksama sudździa pastanaviła kanfiskavać noŭtbuk u dachod dziaržavy. I patłumačyła, što nie zadavoliła chadajnictva advakata ab spynieńni kryminalnaj spravy, bo «złačynstva naniesła škodu nie tolki Biedunkieviču, ale i siamji».
Pavodle abvinavačańnia, Alaksiej Mačałaŭ u rajonnym čacie «Dambroŭka-5» abraziŭ Michaiła Biedunkieviča, tym samym pryniziŭšy jaho honar i hodnaść, asabistyja i prafiesijnyja jakaści.
Na sudzie Mačałaŭ skazaŭ, što całkam pryznaje vinu, i raskajaŭsia ŭ zroblenym. Jon patłumačyŭ, što zrabiŭ heta, bo ŭ toj momant u jaho było ciažki emacyjny stan, byli ciažkaści na vučobie. Jon ubačyŭ infarmacyju pra Biedunkieviča ŭ telehram-kanale i vyrašyŭ napisać abrazu ŭ čacie rajona.