«Kali my heta prapanoŭvajem, to my ličym heta realnym»
— Palitolahi paźbiahajuć prahnozaŭ nakont terminaŭ, kali adbuducca pieramieny. Palityki taksama ŭzvažvajuć svaje słovy, ale nia mohuć uciakać ad adkazaŭ, nia mohuć nie davać ludziam perspektyvy. Kaliści havaryłasia, što da kanca novaha hodu maje być pryznačanaja data novych vybaraŭ. Hetaha nie adbyłosia. U stratehii pieramohi nazvany maj jak termin, kali majuć raspačacca pieramovy pra novyja vybary. Nakolki heta realistyčna? I što stanie z davieram da demakratyčnych siłaŭ, jakija pracavali nad stratehijaj, kali hetyja prahnozy nia spraŭdziacca?
— Kali my heta prapanoŭvajem, to my ličym heta realnym. My nia stavim ultymatum nikomu, my stavim ultymatum sami sabie. My stavim sabie dedłajn i bačańnie dziejańniaŭ mienavita da hetaha kalandarnaha miesiaca. Ci adbudziecca heta ŭ traŭni? Tak, my ŭ heta vierym. Ci mohuć adbycca peŭnyja źmieny? Kaniečnie, mohuć. Chto ž z nas zmoža pradbačyć budučyniu? My nia budziem źviartacca da ekstrasensaŭ, kab atrymać bačańnie budučyni biełaruskaha narodu. Usio ŭ našych siłach, usio ŭ našych rukach.
My matyvavanyja, my majem alharytm dziejańniaŭ. My majem plan dziejańniaŭ, majem dadatkovyja elementy, jakija buduć uklučacca krok za krokam. Kali my nia budziem stavić sabie hetyja dedłajny, kali my nia budziem razumieć, što nam treba, zakasaŭšy rukavy, vielmi aktyŭna pracavać, tady navošta ŭsim hetym zajmacca? Ci možam my pahadzicca z tym, što ludzi buduć siadzieć u turmach? Ci možam my pahadzicca z tym, što kryminalnyja spravy ab zabojstvie Tarajkoŭskaha, Bandarenki i inšych nia buduć zaviedzienyja? My nia možam z hetym pahadzicca. Značyć, ci jość u nas vybar? U nas niama vybaru. My pavinny pracavać. Pracavać systemna.
Plan vyzvaleńnia pa punktach
— Patłumačcie klučavyja punkty Planu biełaruskaha vyzvaleńnia, raspracavanaha Narodnym antykryzisnym kiraŭnictvam.
— Dla nas vielmi važna toje, što my abjadnanyja. Usie palityčnyja siły, jakija, na žal, vymušana akazalisia za miežami Biełarusi (heta nie było našaj volaj i našym žadańniem, represii vymusili nas źjechać), abjadnalisia, kab realizavać stratehiju i kankretny plan dziejańniaŭ «Viasna-2021 biełaruskaha vyzvaleńnia». Damoŭlenaść była dasiahnutaja ŭ Trokach niekalki tydniaŭ tamu na sustrečy štabu Śviatłany Cichanoŭskaj, štabu Valera Capkały i Narodnaha antykrizisnaha kiraŭnictva.
Treba maštabavać cisk na nielehitymnuju ŭładu. Heta možna zrabić praz ekanamičny cisk, i tut vykarystoŭvajucca jak pramyja, tak i ŭskosnyja instrumenty cisku. Prykład uskosnaha cisku — my viadziom aktyŭny dyjaloh z rejtynhavymi ahienctvami, Mižnarodnym valutnym fondam, najbujniejšymi bankami, jakija ažyćciavili letaś vypusk eŭrabondaŭ, eŭraablihacyj. Uskosny cisk — nieabchodnaść uvodzić sankcyi adnosna tych dziaržaŭnych bankaŭ, u jakich na siońnia znachodziacca rachunki AMAPu, Departamentu vykanańnia pakarańniaŭ, KDB, tych strukturaŭ, jakija ažyćciaŭlajuć represii ŭ dačynieńni da mirnych biełaruskich hramadzianaŭ.
Nastupny element cisku — persanalnyja sankcyi, i tut inicyjatyva ŭ našych partneraŭ — EZ i inšych krainaŭ (bolš za 40 krainaŭ dałučylisia da sankcyj suprać nielehitymnaj ułady Biełarusi). Persanalnyja sankcyi pavinny być uviedzienyja ŭ dačynieńni da sudździaŭ, jakija ašałamlalnymi tempami vynosiać prysudy z ahramadnymi terminami dla mirnych pratestoŭcaŭ. Persanalnyja sankcyi pavinny tyčycca i inšych asobaŭ, datyčnych da represij, ale sudździ — adzin z pryjarytetaŭ.
Nastupny element cisku i našych dziejańniaŭ — antyprapahanda. Toje, što bačym na tak zvanym narodnym schodzie, — prapahandysckaja rytoryka. Jana chłuślivaja. Luby tezis Łukašenki i Makieja možna abvierhnuć. My pavinny danosić da ludziej jak maha bolej praŭdzivaj infarmacyi.
Nastupny element cisku — pierachod čynoŭnikaŭ na bok narodu. Hety prajekt my ŭžo ažyćciaŭlajem, i za pieršyja try dni sabrana 600 podpisaŭ pad adkrytym listom za adstaŭku Łukašenki.
Aktyŭnyja dziejańni siłavikoŭ na baku narodu — adzin z najbolš składanych elementaŭ i vielmi važny dla dasiahnieńnia našych metaŭ. Toj kirunak, pra jaki my nia možam havaryć publična, ale jon vielmi nieabchodny dla ŭzmacnieńnia cisku na režym.
Źniešniepalityčny cisk. Režym nielehitymny i nia maje prava pradstaŭlać narod, zaklučać kredytnyja pahadnieńni. Ja nakiravaŭ infarmacyjny list kiraŭniku Centrabanku Rasiei pra toje, što ŭłada ŭ Biełarusi nielehitymnaja i što zaklučeńnie kredytnych pahadnieńniaŭ pryvodzić da patencyjnych ryzykaŭ.
Mabilizacyja hramadztva. Jana praduhledžvaje vuličnyja akcyi pratestu. My bačym, što ŭłady vielmi žorstka abychodziacca z tymi, chto vykazvaje svoj punkt hledžańnia na vulicy. My pavinny być kreatyŭnymi, mabilnymi, razumnymi. My takimi źjaŭlajemsia, i my heta ŭmiejem i viedajem, jak rabić. Ci majem my prava bajacca? Tak, kaniečnie, u nas jość prava bajacca. Ale ci majem prava admovicca ad heta važnaha kirunku dziejnaści? Nia majem prava, jak i nia majem prava zabyć pra 250 palitviaźniaŭ, pra žurnalistaŭ, jakija prachodziać pa kryminalnych spravach.
Chto budzie na čale kalony
— Vy kazali ŭ adnym z apošnich interviju pra adsutnaść lideraŭ vuličnaha pratestu padčas masavych akcyj u žniŭni, kali možna było pierałamać sytuacyju, ale tady nichto nia ŭziaŭ na siabie adkaznaść za toje, kab kiravać sotniami tysiačaŭ ludziej i nakiroŭvać ich. U ciapierašniaj sytuacyi ŭ Biełarusi jość mocnaja, haryzantalnaja samaarhanizacyja, ludzi takim čynam pratestujuć u dvarach i svaich rajonach, kab nia być zatrymanymi i pry hetym paviedamić pra svaju aktyŭnaść jak maha šyrej. Jak vam bačycca, pry viartańni masavaha vuličnaha pratestu ci źjaviacca ŭ im lidery? Bo ciapierašnija aryšty i terminy śviedčać pra toje, što ŭłady maksymalna izalujuć i karajuć aktyŭnych, inicyjatyŭnych ludziej.
— Historyja nia maje ŭmoŭnaha ładu. Možna kolki zaŭhodna viartacca ŭ dumkach u žnivień 2020 hodu. Heta jašče adzin adkaz režymu na jaho rytoryku pra arhanizacyjny, strukturny resurs, pra dziejańni z boku zachodnich dziaržavaŭ dziela ažyćciaŭleńnia «kalarovaj revalucyi» ŭ Biełarusi. Ja vyjšaŭ pierad Kupałaŭskim teatram 14 žniŭnia, ja nie rychtavaŭsia da vuličnych pratestaŭ i nie rychtavaŭsia stać lideram pratestu. Ja pabačyŭ heta realna, ja byŭ hetamu śviedkam, kali ŭstupiŭ u Kaardynacyjnuju radu, što sapraŭdy nie było tych ludziej, jakija mahli stać na čale kalony i pavieści jaje ŭ tym ci inšym kirunku. Heta jašče raz paćviardžaje, što nijakaj splanavanaj akcyi nie było, heta była emacyjnaja, masavaja, całkam abhruntavanaja reakcyja na falsyfikacyi, represii i hvałt ułady. Kali b była takaja struktura i siła, niaŭžo nie było b čałavieka, jaki pavioŭ by ludziej i zaklikaŭ da peŭnych dziejańniaŭ?
Što tyčycca siońniašniaj sytuacyi — tak, jość decentralizacyja, jość lakalnaja aktyŭnaść, tamu vielmi važna maksymalna abjadnać resursy i patencyjał ludziej, jakija najbolš aktyŭnyja, jakija hatovyja vychodzić i jakija vychodziać kožny dzień. Heta najvažniejšaja praca, jakaja staić ciapier pierad štabam i antykryzisnym kiraŭnictvam, — jak abjadnać hety resurs i padrychtavać jaho da toj samaj važnaj akcyi, jakaja pavinna adbycca, da taho samaha masavaha vychadu, na jaki my spadziajomsia, raźličvajem i vierym, što jon adbudziecca ŭ adpaviedny momant.
Ličbavy referendum, jaki moža stać i realnym referendumam
— Raskažycie bolš detalova pra ličbavy referendum.
— Jość vielmi šmat biełarusaŭ, jakija absalutna nie hatovyja žyć u ciapierašniaj krainie, ale jany nie hatovyja vyjści na vulicu. Dla hetaj častki hramadztva, jak i dla aktyŭnaj častki hramadztva, my prapanoŭvajem ličbavy referendum, kab atrymać zrazumiełuju i dakładnuju infarmacyju pra mierkavańnie biełaruskaha hramadztva pa šerahu važnych pytańniaŭ, u tym liku i pa tych pytańniach, pra jakija kaža Łukašenka.
Takim čynam, jon śledam za nami idzie. My prapanavali hety paradak dnia. My prapanoŭvajem referendum. I biełarusy vyznačać, kudy budzie ruchacca Biełaruś, a nie Łukašenka i tyja ludzi, što siadziać na hetym tak zvanym «usiebiełaruskim narodnym schodzie». Atrymaŭšy hetyja vyniki, my budziem mieć absalutnaje prava z boku hramadztva skazać Łukašenku — voś mierkavańnie narodu, vy pavinny vykanać hetyja patrabavańni. Kali nie, tady źjaŭlajecca mahčymaść masavych aktyŭnych dziejańniaŭ.
Jak dadatkovaje dziejańnie — mahčymaść praviadzieńnia realnaha referendumu. Łukašenka zajaŭlaje pra stvareńnie kanstytucyjnaj kamisii, kab razhledzieć reformu Kanstytucyi, — my jakraz i prapanujem, što choča bačyć narod, ci choča jon prezydenckuju respubliku, jak zajaŭlaje Łukašenka, ci parlamencka-prezydenckuju, ci prosta parlamenckuju respubliku. My budziem dyktavać Łukašenku, na jakich umovach budzie prachodzić hety referendum.
Kaniečnie, najchutčej, Łukašenka admović nam u rehistracyi hetych pytańniaŭ, tut niama iluzij. I tady praz maštabavańnie cisku, praz farmavańnie hramadzkaj dumki adbudziecca maksymalny rost temperatury ŭ nastrojach hramadztva. I ŭ hety momant stanie pytańnie viartańnia lideraŭ. I kali da hetaha budzie hatovaje hramadztva, my ŭsie budziem hatovyja, dadatkovym impulsam moža stać viartańnie lideraŭ u Biełaruś.
