Hałoŭny architektar Maskvy Siarhiej Kuźniacoŭ, vystupajučy na hramadskich słuchańniach pa pytańni ab viartańni pomnika zasnavalniku i kiraŭniku VČK Fieliksu Dziaržynskamu na Łubianskuju płošču, zajaviŭ, što nie suprać viartańnia manumienta, pieradajuć «Adkrytyja miedyja». Jon nahadaŭ, što na Łubianskaj płoščy zaŭsiody niešta ŭzvyšałasia, tam mahčymaja daminanta, heta značyć ŭstalavańnie niejkaha bujnoha abjekta.
Prykładna ŭ tym ža klučy vykazaŭsia i były ministr kultury, a ciapier śpiecpradstaŭnik prezidenta RF pa mižnarodnym kulturnym supracoŭnictvie Michaił Švydkoj. Adnak jon zaznačyŭ, što pomnik, jaki moh by stać takoj daminantaj, pavinien spryjać kansalidacyi hramadstva, «a nie čarhovaj niazhodzie i zvadzie z nahody taho, chto tam staić». Pavodle jaho słoŭ, na hetym miescy moža stajać pomnik zusim nie Dziaržynskamu, a, naprykład, Juryju Andropavu, jaki taksama «adyhraŭ vialikuju rolu ŭ žyćci hetaha miesca».
Pomnik Dziaržynskamu na Łubiancy, pierad budynkam KHB SSSR (ciapier FSB RF) byŭ adkryty ŭ 1958 hodzie, a źniesieny — u 1991-m paśla pravału sproby dziaržaŭnaha pieravarotu HKČP.
U pačatku lutaha hetaha hoda prapucinskija błohiery, piśmieńniki i žurnalisty, siarod jakich Zachar Prylepin i Alaksandr Prachanaŭ, źviarnulisia da ŭrada RF z prapanovaj viarnuć Dziaržynskaha na Łubianku.
