Asnoŭnymi arhanizatarami vystavy-kirmaša vystupajuć Ministerstva infarmacyi i Minharvykankam. Jak zvyčajna, jana ładzicca ŭ budynku vystavačnaha centra «Biełekspa» na praśpiekcie Pieramožcaŭ. Hieahrafija krain, što pradstaŭleny nacyjanalnymi ekspazicyjami albo asobnymi vydaviectvami, amal całkam vyklučaje krainy Jeŭropy: u vystavie ŭdzielničajuć Kyrhyzstan, Siryja, Tadžykistan, Kazachstan, Turcyja, Izrail, Rasija, Ukraina, Hiermanija dy inšyja. Słohan 28-j vystavy — «Kniha abjadnoŭvaje ludziej i krainy».
Udzielničajuć, viadoma, i biełaruskija vydaviectvy. Siarod niezaležnych — «Halijafy». Jaho dyrektar Źmicier Višnioŭ kaža, što ŭ pracu vystavy-kirmaša jany ŭklučajucca tolki apošnija try hady, a da hetaha ich siudy nie puskali.
«Rašeńnie brać udzieł u vystavie pieradusim usio ž ekanamičnaje, bo nam treba vyžyvać i pradavać svaje knihi, a admovicca značyła b adsiačy siabie ad vialikaj aŭdytoryi. My vydali niekalki navinak, u nas kredyty ad litoŭskich partnioraŭ, treba addavać hrošy. Kali my nie budziem brać udzieł u takich vystavach, to paprostu vylecim u trubu. Da taho ž heta praca vydaviectva: u nas vyjšli navinki — nam treba danieści ich da čytača, tut my taksama adkaznyja za aŭtaraŭ».
Na stendzie «Halijafaŭ» pa inicyjatyvie Polskaha instytuta ŭ Minsku vystaŭleny taksama knihi vydaviectvaŭ «Limaryus», «Januškievič» i «Łohvinaŭ», što byli vydadzieny pry padtrymcy instytuta. U dni pracy vystavy tut zapłanavanyja aŭtohraf-siesii Mikoły Adama, Vieraniki Laŭčuk, Paŭła Darochina, Paŭła Michalkieviča, Kiryła Stasielki dy polskaha aŭtara Michała Chabrasa.
Pobač z «Halijafami» raźmieščany stend vydaviectva Arche — taho samaha, vydańni jakoha źjavilisia ŭ niadaŭnim roliku MUS pad vyhladam vyniataj «ekstremisckaj litaratury».
«My majem vialikuju historyju pryznańnia našych vydańniaŭ ekstremisckimi, — kaža knihavydaviec dy hałoŭny redaktar časopisa Arche Valer Bułhakaŭ. — Pieršym rezanans atrymaŭ vypadak u 2007-2008 hadach, kali bieraściejski KDB pryznaŭ adzin z našych numaroŭ nielehalnym. Ale ŭsie svaje vydańni my robim, kali skarystacca kazionnaj farmuloŭkaj, va ŭstanoŭlenym zakonam paradku. Ludzi, jakija ŭ 2021 hodzie vystaŭlajuć papiarovyja vydańni ŭzoram ekstremizmu, myślać u katehoryjach savieckaj epochi. Kali ŭ 1950-60 hadach kniha i mahła być raznosčykam inšadumstva, to ciapier hetaja ideja vyhladaje fantasmaharyčna».
Vydaviectva Arche ŭdzielničaje ŭ mižnarodnaj knižnaj vystavie-kirmašy ŭžo dziesiać hadoŭ.
«Pa statystycy arhanizataraŭ, kožny hod vystavu naviedvaje 25-30 tysiač čałaviek. Heta vialikaja aŭdytoryja i składajecca jana nie tolki ź minčan: siudy pryjazdžajuć ludzi z usioj krainy, my ź imi hutarym, a dla kožnaha vydaviectva važnaja zvarotnaja suviaź. Hublać takuju mahčymaść ź ideałahičnych pryčyn my paličyli niavartym. Da taho ž na fonie trahičnych padziej, jakija adbyvajucca ŭ krainie, heta pa-svojmu niakiepski znak, maŭlaŭ, sucelnaha zadušeńnia frontu biełaruskamoŭnych kulturnickich inicyjatyŭ nie zdaryłasia. Paśla biesprecedentnaha nastupu na biełaruskuju kulturu my pryvatna i publična vykazali salidarnaść z vydaviectvami, jakija ad hetaha paciarpieli».
Vystava-kirmaš budzie pracavać da 21 lutaha. Praz epidemijałahičnuju situacyju stendy ŭ vystavačnym kompleksie raźmieščany z ulikam nieabchodnaj dystancyi, a ŭ kožnaha naviedvalnika pry ŭvachodzie vymiarajecca tempieratura.
