Kiraŭnik MZS adznačyŭ, što siońnia pravy čałavieka stali ŭlubionaj padstavaj «tak zvanych śpiełych demakratyj» dla advolnych abvinavačvańniaŭ u adras tych dziaržaŭ, jakija vykonvajuć abaviazacielstvy ŭ śfiery pravoŭ čałavieka, stroha prytrymlivajučysia mižnarodnych damovaŭ, a nie ich tendencyjnych tłumačeńniaŭ. Robicca heta, na dumku Makieja, u metach palityčnaj dyskredytacyi ŭłady ŭ hetych dziaržavach, što nie ŭpisvajucca ŭ zachodniuju karcinu śvietu, i ŭ metach likvidacyi hetaj ułady luboj canoj.
— Ja ŭpeŭniena kažu pra heta pa toj prostaj pryčynie, što horača lubimaja cacka zachodnich krain u vyhladzie ekanamičnych sankcyj aktyŭna vykarystoŭvajecca imi dla cisku na inšyja suvierennyja dziaržavy, absalutna nie sumiaščalnaja z kłopatam ab pravach čałavieka, ab samim čałavieku. Takaja taktyka ŭjaŭlaje saboj aburalnaje parušeńnie dekłaracyi pryncypaŭ mižnarodnaha prava, zasnavanaj u 1970 hodzie, u jakoj abvieščana, što nivodnaja dziaržava nie moža ni prymianiać, ni zaachvočvać prymianieńnia adnabakovych ekanamičnych, palityčnych mier abo mier inšaha charaktaru z metaj padparadkavańnia sabie inšaj dziaržavy ŭ ažyćciaŭleńni joju svaich suvierennych pravoŭ, — zajaviŭ Uładzimir Makiej.
Kiraŭnik MZS čarhovy raz padkreśliŭ, što biełaruskija ŭłady nikoli nie śćviardžali, što Biełaruś idealnaja kraina, ale jany kateharyčna nie zhodnyja z subjektyŭnymi abvinavačvańniami ŭ parušeńniach pravoŭ čałavieka, jakija hučać na adras biełaruskich uładaŭ u Radzie AAN pa pravach čałavieka z boku šerahu jaho členaŭ.
— Niama pryčyn dla ekskluziŭnaj uvahi da Biełarusi pa temie pravoŭ čałavieka, akramia jak vyklučna z metaj palityčnaha cisku na zakonny ŭrad. Nivodnaja kraina ŭ Jeŭropie nie padviarhajecca takomu mocnamu cisku z boku zachodnich krain, jak Biełaruś.
Padobna na toje, što chtości nie moža pryzvyčaicca da dumki, što niahledziačy na žorstki ekanamičny i palityčny presinh, biełaruskaja dziaržava raźvivajecca nie pa vykrajenych lakałach zachodnich krain, a tak, jak vyrašaje sam biełaruski narod u svaich ułasnych intaresach. Za hetuju niezaležnuju pazicyju Biełaruś padvierhnułasia žorstkaj atacy zvonku. Padstavaj była abranaja niezadavolenaść častki nasielnictva vynikami prezidenckich vybaraŭ. Z metaj źviaržeńnia dziejnaj ułady byli zadziejničanyja raznastajnyja miechanizmy destabilizacyi ŭnutranaj abstanoŭki: ad tyražavanych u sacyjalnych sietkach fejkavych navin, stymulavańnia i palityčnaj, i finansavaj padtrymki zvonku nibyta «stychijnych» pratestaŭ, da šyrokich naboraŭ palityčnych i ekanamičnych sankcyj. Ale Biełaruś vystajała, my zachavali krainu, jaje suvierenitet i niezaležnaść, — skazaŭ Makiej.
— My z honaram možam zajavić, što biełaruskija harady — adny z samych biaśpiečnych haradoŭ u śviecie, što ŭsim hramadzianam u našaj krainie zabiaśpiečana mahčymaść pracoŭnaj zaniataści, pradastaŭlena prava na piensiju, biaspłatnuju adukacyju i adnu z samych dastupnych i efiektyŭnych u śviecie sistem biaspłatnaj miedycyny, — zajaviŭ Makiej.
Ministr adznačyŭ, što karancinnyja miery, pryniatyja ŭ zachodnich krainach, parušali pravy čałavieka ŭ ich.
