Fota Depositphotos.com
Letaś Jeŭropa ŭviała novaje zakanadaŭstva, zhodna ź jakim sacyjalnyja sietki pavinny vydalać škodny kantent, a taksama vykonvać šerah pravił, jakija praduchilajuć niesumlennuju kankurencyju. Novyja zakony mohuć pryvieści da časovaj zabarony amierykanskich technałahičnych hihantaŭ na terytoryi ES, kali novyja ŭmovy nie buduć vykonvacca.
ZŠA byli na miažy zabarony TikTok i WeChat, bo, pa słovach Trampa, hetyja dadatki pahražajuć nacyjanalnaj biaśpiecy krainy. Adnak administracyja Bajdena pakul što prypyniła hety praces.
Indyja, jakaja zabaraniła TikTok i jašče dziasiatak kitajskich dadatkaŭ letam 2020 hoda paśla pamiežnaha sutyknieńnia indyjskich i kitajskich sałdat, ciapier znachodzicca ŭ kanflikcie z Twitter. Indyjskaje kiraŭnictva zahadała satsietcy zabłakavać bolš za 100 akaŭntaŭ karystalnikaŭ, jakija padtrymlivali pratest fiermieraŭ. Adnak pradstaŭniki kampanii ličać heta parušeńniem svabody słova.
U 2014 hodzie Google zakryła svaju słužbu navin u Ispanii paśla taho, jak urad pryniaŭ zakon, anałahičny tamu, jaki razhladaje ciapier Aŭstralija. Kampanija pahražała pazbavić svaich servisaŭ i Aŭstraliju, adnak u vyniku Google zaklučyła pahadnieńni ź niekatorymi aŭstralijskimi vydańniami.
U lutym hetaha hoda Facebook pazbaviŭ aŭstralijcaŭ dostupu da navin na svajoj płatformie ŭ adkaz na prapanavy ŭradam zakon, jaki vymušaje kampaniju płacić ŚMI, što raźmiaščajuć svaju infarmacyju ŭ sacyjalnaj sietcy. Adnak praź niekalki dzion uradu ŭdałosia častkova dasiahnuć pahadnieńnia z kampanijaj, i dostup byŭ adnoŭleny.
Kali kolkaść padobnych kanfliktaŭ budzie pavialičvacca, to hłabalny internet pieratvorycca ŭ sukupnaść roznych internet-sietak, miežy jakich buduć vyznačacca nacyjanalnymi abo rehijanalnymi miežami.
Spałučeńnie nacyjanalizmu, handlovych sprečak i aściarohi nakont daminavańnia na rynku niekatorych hłabalnych technałahičnych kampanij pryviało da represij z boku ŭradaŭ. Heta pahražaje nie tolki technałahičnym kampanijam, jakija zdoleli pabudavać hłabalny biznes, ale i idei stvareńnia płatform, jakija na roŭnych umovach mohuć vykarystoŭvacca lubym čałaviekam u lubym punkcie śvietu, piša CNN.
«Isnuje hłabalnaja tendencyja da značna bolšaj frahmientacyi internetu, čym heta było raniej», — śćviardžaje Dafna Kieler, dyrektar prahramy rehulavańnia płatform u Centry kibierpalityki Stenfardskaha ŭniviersiteta.
Technałahičnyja kampanii zaležać ad pastajannaha dostupu da miljardaŭ karystalnikaŭ va ŭsim śviecie, adnak urady krain demanstrujuć, što jany hatovyja admovicca ad pasłuh technałahičnych hihantaŭ, kab abaranić svoj suvierenitet u internecie.
«Było b karysna, kali b urady raspracavali peŭnyja standarty nakont taho, chto i ŭ jakoj stupieni maje prava ŭpłyvać na infarmacyju za miežami nacyjanalnych terytoryj», — ličyć Dafna Kieler.
Inakš takaja tendencyja da frahmientacyi internetu budzie tolki pašyracca, što moža pryvieści da niehatyŭnych nastupstvaŭ. Kali ŭ kančatkovym vyniku ŭ kožnaj vialikaj krainie buduć svaje płatformy sacsietak, to hramadzianie buduć mieć roznuju infarmacyju jak ab miascovych, tak i ab suśvietnych padziejach, što pryviadzie da istotnaj roźnicy va ŭsprymańni realnaści, miarkujuć ekśpierty.
