Basmanny sud Maskvy pačnie razhladać kryminalnuju spravu pa abvinavačańni hramadzianina Biełarusi Jurasia Ivaniukoviča ŭ «vandaliźmie, to bo apahańvańni budynkaŭ ci inšych zbudavańniaŭ». 9 traŭnia jon napisaŭ markieram na šyldach, jakija mieściacca na ścianie budynku pasolstva Biełarusi ŭ Rasiei «Žyvie Biełaruś» i «BT chłusić!!!» (BT – Biełaruskaje telebačańnie). Nadpisy tut ža byli ściortyja, a Ivaniukievič byŭ zatrymany.
6 lipienia ŭ Niezaležnym pres-centry adbyłasia pres-kanferencyja z udziełam Jurasia Ivaniukoviča i jahonaha abaroncy Stanisłava Markiełava.
Markiełaŭ adznačyŭ, što nadpisy byli zroblenyja nie na budynku pasolstva, a mienavita na šyldach, jakija, u adroźnieńnie ad budynku, histaryčnaj kaštoŭnaści nie ŭjaŭlajuć, bo źjavilisia tolki ŭ pačatku 90-ch hadoŭ. Aproč taho, nichto z supracoŭnikaŭ pasolstva nie vykazvaŭ pretenzij z nahody psavańnia naležnaj jamu ŭłaśnaści. Tamu nazvać vandalizmam dziejańni jaho padabaronnaha nielha, padkreśliŭ Markiełaŭ.
Advakat raskazaŭ, što Juraś Ivaniukovič amal nie vałodaje rasiejskaj movaj. Pavodle zakonu, jon maje prava na pasłuhi pierakładčyka, pryčym pra heta jaho musili prainfarmavać na zrazumiełaj jamu movie. Adnak takaja prapanova była vykazanaja pa-rasiejsku. Słova «pieravodčyk» u biełaruskaj movie maje inšy sens, čym u rasiejskaj. Tamu Ivaniukovič admoviŭsia ad pasłuh pierakładčyka. Pryznačany jamu advakat biełaruskaj movy nia viedaŭ. Akramia taho, hety advakat nie zajaviŭ nivodnaha chadajnictva pa abvinavaŭčym akcie.
Stanisłaŭ Markiełaŭ, jaki ŭvajšoŭ u spravu niazadaŭha pierad sudom, padkreśliŭ što niemahčyma pravodzić sud nad čałaviekam, kali sudovyja dakumenty składzienyja na niezrazumiełaj jamu movie. Advakat taksama paviedamiŭ, što, nasupierak zakonu, da jaho padabaronnaha nia byŭ zaprošany biełaruski konsuł.
Maksymalnaje pakarańnie pavodle artykułu «vandalizm» – adzin hod papraŭčych rabot.
