Fota Depositphotos.com
U zdarovych ludziej mikroby, jakija daminujuć u kišačniku ŭ rańnim uzroście, składajuć usio mienšuju dolu pa miery stareńnia arhanizma. Adnak adsotak inšych, mienš raspaŭsiudžanych vidaŭ, raście.
U toj ža čas u ludziej, jakija majuć šmat prablem sa zdaroŭjem u pažyłym uzroście, nazirajecca advarotny praces: skład ich mikrabijomu zastajecca pastajannym, što, u svaju čarhu, pryvodzić da bolš rańniaj śmierci, piša The New York Times.
Mikrabijom kišačnika, jaki źmianiajecca z uzrostam, źjaŭlajecca prykmietaj zdarovaha stareńnia, śćviardžaje adzin z aŭtaraŭ daśledavańnia Šon Hibans, daśledčyk Instytuta sistemnaj bijałohii ŭ Sietle.
Mnohija daśledavańni pracesu stareńnia kancentrujucca na tym, kab jak maha daŭžej zachavać čałavieka «maładym». Adnak novaje daśledavańnie daje inšyja vysnovy. Mikrabijom, jaki zdarovy dla dvaccacihadovaha, nie zdarovy dla pažyłoha čałavieka. Kali mikrabijom źmianiajecca, to heta značyć, što ŭsie defiekty, jakija źjaŭlajucca z uzrostam, prystasoŭvajucca da arhanizma, što nie vyklikaje surjoznych prablem sa zdaroŭjem.
Navukoŭcy praanalizavali źviestki ab mikrabijomie ŭ prykładna 9 tysiač darosłych ad 18 da 101 hoda.
Mikrabijom kišačnika chutka źmianiajecca ŭ pieršyja try hady žyćcia. Zatym na praciahu dziesiacihodździaŭ jaho skład zastajecca adnosna stabilnym. Adnak kali ludzi dasiahajuć siaredniaha ŭzrostu, jon chutčej źmianiajecca ŭ zdaraviejšych ludziej, ale mała źmianiajecca ŭ tych, chto maje prablemy sa zdaroŭjem.
Vyniki daśledavańnia pakazali, što tyja, chto mieŭ bolš za ŭsio źmien u mikrobnym składzie, mieli bolš vysoki ŭzrovień vitaminu D i nižejšy ŭzrovień chalesterynu. Jany ŭžyvali mienš lekaŭ i byli macniejšyja fizična.
Bolš za toje, daśledčyki vyjavili ŭ takich ludziej bolš mietabalitaŭ u kryvi, jakija vypracoŭvajucca kišačnymi mikrobami. U papiarednich daśledavańniach mietabality ŭvodzilisia myšam, što dazvalała im zachoŭvać fizičnuju aktyŭnaść i ŭstojlivaść da chvarob.
Tamu navukoŭcy rajać nadavać uvahu rehularnaj fizičnaj nahruzcy, a taksama mienš užyvać mocna apracavanyja pradukty i čaściej uklučać u racyjon rybu i klatčatku. Usio heta maje stanoŭčy ŭpłyŭ na mikrabijom kišačnika.
