1. U tablicy ŭsio bolš-mienš pradkazalna
Zirnicie ŭ turnirnuju tablicu: siensacyjaj tam možna nazvać chiba što lidarstva «Isłačy». Kamanda Radźkova vyjhrała matčy ŭ «Słavii» i «Smarhoni», tamu taki pośpiech niepradkazalnym nazvać składana. Najbolš składanyja hulni ŭ «vaŭkoŭ» jašče napieradzie.
Fota Ksienii Dzieraviaha.
Akramia «Isłačy», biez strat idzie jašče «Šachcior». Čempijony vyšukvajuć idealny skład, vyjhrajuć niaznačna, ale ž nie prajhrajuć. Ich hałoŭnyja kankurenty ź Minska, Barysava i Bresta ŭžo spatyknulisia na turnirnaj chadzie, ale nie tak istotna, kab heta vyhladała prajavaj kryzisu.
Dla paraŭnańnia: hod tamu paśla dvuch turaŭ z «nulom» na dnie tablicy apynulisia BATE i minskaje «Dynama». Pravał na starcie tady kaštavaŭ barysaŭcam čempijonstva. Sioleta ž pakul bieź niespadziavanak siarod aŭtsajdaraŭ.
2. Favaryty pakul niestabilnyja
U druhim tury minskaje «Dynama» i BATE nie zmahli viarnucca ź Viciebska i Bresta ź pieramohami. Sieradniaki ź niebłahoj linijaj abarony akazalisia favarytam nie pa zubach.
Fota FK «Dynama-Minsk».
Brescki «Ruch» naohuł razbazaryŭ pieravahu ŭ dva miačy ŭ matčy z «Minskam», vynikam čaho stała druhaja zapar ničyja. Pakul u Kiryła Alšeŭskaha nijak nie atrymlivajecca z patencyjna najmacniejšaha składu lihi stvaryć najmacniejšuju kamandu.
«Šachcior» taksama nie vyhladaje niaŭraźlivym, choć i pieramoh dvojčy. Ale, jak i ŭ ich susiedziaŭ pa tablicy z «Isłačy», važnyja hulni ŭ salihorcaŭ jašče napieradzie. Bały «harniaki», jak i ich kankurenty, buduć hublać.
3. Pakul lehijaniery siabie słaba prajaŭlajuć
Prajavaj mižsiezońnia ŭ biełaruskim futbole staŭ masavy adjezd zamiežnych futbalistaŭ, jakija byli na viadučych rolach u našych kłubach. Zamiest Jachšybojeva, Naściča, Ściviena, Habryeła Ramasa, Lipe Viełozu, Kadzimiana pryjechali novyja hulcy, ź jakich pakul składana kahości adznačyć.
Tyja, chto zastaŭsia, taksama nie mohuć paradavać jaskravaj hulnioj. Budziem čakać, što ź pierachodam na naturalny hazon lehijaniery zmohuć pakazać svajo majsterstva.
Sprahnazujem, što siarod top-bambardziraŭ čempijanatu budzie Demba Darbo z «Šachciora», matoram BATE budzie Šachboz Umaraŭ, a taksama vystralić čarhovy brazilec u Žodzinie.
4. «Limitčyki» karciny nie psujuć i hatovyja stać lidarami ŭ asobnych kamandach
Adna ź fišak čempijanatu Biełarusi — uviadzieńnie limitu na maładych hulcoŭ u kamandach. Ciapier na poli abaviazkova pavinien być jak minimum adzin futbalist, nie starejšy za 21 hod. U hetaj miery jość šmat krytykaŭ, ale «limitčyki» ŭ niekatorych kamandach hrajuć važnuju rolu i hatovyja brać na siabie lidarstva.
Tak, Daniła Niačajeŭ, jakoha Vital Žukoŭski vypisaŭ z «Biełšyny» ŭ BATE, zasłužyŭ vyklik u nacyjanalnuju zbornuju, hulec «Rucha» Arciom Kancavy z dvuma zabitymi miačami dzielić pieršy radok śpisu bambardziraŭ, a 20-hadovamu Arciomu Makaŭčyku daviarajuć abaraniać varoty «Enierhietyka-BDU».
Arciom Kancavy zabivaje «Homielu». Fota FK «Ruch».
Siarod tych «limitčykaŭ», za jakimi varta sačyć, možam vyłučyć Rusłana Lisakoviča («Isłač»), Ramana Davyskibu (minskaje «Dynama»), Hleba Šaŭčenku («Šachcior»), Ramana Pasieviča («Nioman»), Alaksandra Šaściuka (bresckaje «Dynama») i Kiryła Zinoviča («Minsk»). Spadziajomsia, z časam hety śpis budzie tolki papaŭniacca.
5. «Smarhoń» i «Spadarožnik» pravalvajuć start i buduć ad pačatku zmahacca za «vyžyvańnie»
Siurpryzaŭ nie zdaryłasia, i «Smarhoń» na paru sa «Spadarožnikam» pa vynikach dvuch turaŭ zamykajuć tablicu z nulom bałaŭ. Da taho ž, kamandy pakul nie zdoleli adznačycca zabitymi miačami.
Aceńvajučy hulni novych kamand, nielha skazać, što jany nie zmahajucca, ale navat matčy z supastaŭnymi pa mocy kamandami pakul prachodziać pa adnym i tym ža scenaryi: prapuščany hoł u pieršym tajmie, sproby adhulacca ŭ druhoj pałovie da druhoha prapuščanaha miača.
Znajści vychad z takoha stanovišča «Smarhoni» i «Spadarožniku» budzie vielmi składana: pradpasyłki dla vypraŭleńnia situacyi pakul niezaŭvažnyja.
***
27 sakavika zbornaja Biełarusi pa futbole startuje ŭ adbory na čempijanat śvietu 2022 hoda matčam suprać zbornaj Estonii. Z-za karanavirusa ŭ im nie zmohuć uziać udzieł hałoŭny trenier i ažno 15 futbalistaŭ.
U vyniku ekstranna na dapamohu byli paklikany 10 novych futbalistaŭ, jakimi budzie ŭ Minsku kiravać były trenier zbornaj Marcin Rejm.
Kadravyja prablemy ŭ supiernika dadajuć biełarusam šancaŭ na pieramohu.
