Abvinavačanyja — Hanna Zadorskaja, Elina Karyćka, Ihar i Siarhiej Sidarovičy, palitviaźni Ryhor Saładoŭnikaŭ i Dźmitry Karabiejnik. Pad vartaj da suda ŭtrymlivalisia dvoje apošnich žycharoŭ Maładziečna, astatnim byli abranyja inšyja miery strymańnia: asabistaje paručalnictva ci padpiska ab niavyjeździe.
Adzin z abvinavačanych — Ihar Sidarovič — čałaviek ź invalidnaściu: jon maje adnu nahu.
Spravu razhladaje sudździa Viktoryja Palaščuk, dziaržaŭnaje abvinavačańnie padtrymlivaje prakuror Piarkoŭski. Paciarpiełymi pa spravie vystupajuć kiroŭcy maładziečanskaha aŭtaparku i chutkaj dapamohi, jakija ŭ toj dzień znachodzilisia na darozie: Hierasimiuk, Miłaševič, Jakimiuk, Kaciaryna Dubina, Siarhiej Tumiel. Jany nie vykazali nijakich materyjalnych i maralnych pretenzij.
Dziaržaŭny abvinavaŭca pačaŭ ahałošvańnie piśmovych dokazaŭ pa spravie. Piarkoŭski začytaŭ dopisy z telehram-čatu, dzie abvinavačanyja abmiarkoŭvali praviadzieńnia akcyi, što pisać na baniery, damaŭlalisia pra sustrečy. Tam ža płanavałasia pravieści jašče adnu akcyju.
Nad spravaj pracavała śledčaja hrupa z troch śledčych Maładziečanskaha RASK. Advakaty źviartali ŭvahu suda, što ŭ materyjałach spravy jość niedakładnaści ŭ dakumientach (dzieści adsutničajuć štampy i numary vychodnaj karespandencyi, niekatoryja niedakładna ahałošvaŭ dziaržabvinavaŭca).
Pierakryćcio Vialikaha Haścinca 21 listapada. Fota SK
U sudzie demanstravali rečavyja dokazy: bałončyki z farbaj, banier, mabilnyja telefony i fłešku. Siarod dokazaŭ byli aŭdyjazapisy hutarak milicyjanieraŭ ź Siarhiejem Sidarovičam i Elinaj Karyćkaj, videa z kamiery banka na skryžavańni. Uklučali zvanok paciarpiełaj Hierasimiuk u milicyju: «Tut hetyja bieł-čyrvonyja pierakryli darohu sa ściahami svaimi!»
Sudździa Palaščuk adchiliła naprykancy pasiadžeńnia dva chadajnictvy: ab paŭtornaj psichičnaj ekśpiertyzie Siarhieja Sidaroviča i ab vyklučeńni paciarpiełych z pracesu, bo, na dumku abaroncaŭ, jany takimi nie źjaŭlajucca.
25 sakavika davali pakazańni paciarpiełyja Uładzimir Jakimovič, Aksana Hierasimiuk, Kaciaryna Dubina, Siarhiej Tumiel, Viktar Miłaševič.
Jakimovič i Tumiel — fielčar i kiroŭca chutkaj dapamohi. Jany ŭspaminajuć, što bačyli, jak Haściniec pierakryli, ale abureńnia nie było. Abodva skazali, što, chutčej za ŭsio, stavilisia da hetaha niejtralna.
Tumiel raskazaŭ, što śledčy źviazaŭsia ź im, kali jon byŭ na samaizalacyi praz karanavirus. Tumiel paprasiŭ śledčaha, kab toj pa jaho prośbie ŭziaŭ pakazańni kalehi, bo jany pavinny być padobnyja. List z pakazańniami Tumiel padpisaŭ u mašynie śledčaha, ich nie čytaŭ.
Dubina taksama była padčas pierakryćcia Haścinca ŭ svaim aŭtamabili. Kaža, što ŭ jaje nijakich pretenzij da ludziej nie było. Na jaje dumku, jany vykazvali svaje pohlady.
Miłaševič kiravaŭ hramadskim aŭtobusam. Pasažyry nie vykazali svajoj niazhody, što aŭtobus zatrymaŭsia. Sam Miłaševič niejtralna adreahavaŭ na vychad ludziej.
21 listapada Hierasimiuk śpiašałasia na sustreču, u vyniku padjechała pad banier. Jak śćviardžaje, jaho nichto nie padymaŭ. Jana ŭpeŭniłasia, što nikomu nie paškodzić i prajechała praź jaho. Paśla sustrečy patelefanavała na liniju 102.
— Tak, ja patelefanavała na liniju 102. Spyniłasia kala Hastranoma, patelefanavała. Čamu nie raniej? Tamu što była za styrnom.
26 sakavika ŭ raźbiralnictvie zasłuchoŭvali pakazańni śviedak, sud vyvučaŭ piśmovyja i rečavyja dokazy.
Pakazańni śviedak
Alaksandr Franckievič — milicyjanier patrulna-pastavoj słužby Maładziečanskaha RAUS. Padčas instruktažu ŭ adździaleńni na nastupny dzień paśla akcyi dali aryjenciroŭku. U hety dzień Franckievič znachodziŭsia va aŭtapatruli. La Čyrvonaha kaścioła pa radyjosuviazi paviedamili, što pa prykmietach z aryjenciroŭki iduć padobnyja mužčyny. Ich zatrymali ŭ dvarach la vulicy Mahistralnaj. Franckievič nie pamiataje, kaho dakładna zatrymaŭ. Videa zatrymańnia bačyŭ, ale nie pamiataje, chto jaho zdymaŭ.
Mikałaj Adaškievič — kiroŭca aŭtobusnaha parka. Jon nie bačyŭ momantu akcyi, bo jechaŭ u tym miescy krychu paźniej paśla padziej. U toj dzień byŭ na maršrucie №9. Skryžavańnie Vialiki Haściniec — Bahdana Chmialnickaha prajechaŭ biez prablem.
Maryna Saładoŭnikava — maci abvinavačanaha — pryjšła ŭ zał pasiadžeńnia z papierkaj. Jana padyšła da trybuny i adrazu začytała, što skarystajecca artykułam 27 Kanstytucyi, śviedčać suprać syna nie budzie.
Viktoryja Sidarovič — dačka Ihara Sidaroviča i siastra Siarhieja Sidaroviča. U toj dzień była na pracy ŭ škole. Joj dasłali fotazdymak akcyi. Viktoryja nie paznała nikoha na im. Sidarovič zaŭvažyła, što ŭ jaho brata jość psichičnaje rasstrojstva, jamu nieabchodny kurs lačeńnia. Pra heta ž kazaŭ sam Siarhiej Sidarovič, kali davaŭ pakazańni.
Alaksandr Kušal — kamandzir roty patrulna-pastavoj słužby Maładziečanskaha RAUS. 22 listapada zastupiŭ na słužbu pa achovie hramadskaha paradku. Na instruktažy raskazali pra pierakryćcio Vialikaha Haścinca dniom raniej. Padčas słužby ŭ radyjoefiry paviedamili pra mužčyn, jakija byli padobnyja pa prykmietach da tych, chto pierakryŭ vulicu.
— Nie pamiataju, jak rabili videazapis. Ale ŭ internecie videa jość, ja jaho hladzieŭ, to-bok videafiksacyja była. Nie viedaju, chto rabiŭ videa. Nie hatovy zaraz adkazać.
Kušal nie pamiataje, kaho z abvinavačanych zatrymaŭ.
29 sakavika baki pierajšli da sprečak.
Dziaržaŭny abvinavaŭca Piarkoŭski zapatrabavaŭ dla ŭsich abvinavačanych ab pierakryćci Vialikaha Haścinca chatniuju «chimiju». Dźmitryju Karabiejniku, Ryhoru Saładoŭnikavu, Siarhieju i Iharu Sidarovičam — pa adnamu hodu i šeść miesiacaŭ abmiežavańnia voli biez nakiravańnia ŭ vypraŭlenčuju ŭstanovu. Elinie Karyćka, Hańnie Zadorskaj — hod abmiežavańnia voli biez nakiravańnia ŭ vypraŭlenčuju ŭstanovu.
Advakaty nastojvali, što dziejańni abvinavačanych nie parušyli hrafik ruchu hramadskaha i śpiectranspartu, nie prynieśli nijakaj škody žyćciu i zdaroŭju ŭdzielnikam ruchu. Nijakaha namieru dla naŭmysnaha błakavańnia darohi ŭ abvinavačanych taksama nie było, ab čym śviedčać materyjały spravy. Nijakich pretenzij nichto nie vystaŭlaŭ.
Apošniaje słova abvinavačanych
U apošnim słovie Karabiejnik pryznaŭ vinu i raskajaŭsia. Karyćka adznačyła, što nie ličyć, što ździejśniła złačynstva. Siarhiej Sidarovič pahadziŭsia sa słovami abarony i prosić vyzvalić aryštavanych z-pad varty. Ihar Sidarovič paćvierdziŭ, što nie ŭdzielničaŭ u akcyi. Zadorskaja skazała, što nichto nie staviŭ metaj parušyć praviły darožnaha ruchu, a taksama paprasiła źmianić mieru strymańnia dla aryštavanych. Saładoŭnikaŭ admoviŭsia ad apošniaha słova.
Prysud budzie abvieščany 31 sakavika ŭ 17.00.
