Fota Depositphotos.com
Japonka Maryja Konda pradała 11 miljonaŭ asobnikaŭ knih, pryśviečanych ułasnaj sistemie prybirańnia chaty i roli minimalizmu ŭ padtrymańni paradku.
Jaje idejnyja paplečniki — Džošua Fiłds Miłbiorn i Rajan Nikademus, aŭtary sieryjała «Minimalizm. Dakumientalny film pra važnyja rečy». Sieryjał raspaviadaje pra materyjalnyja rečy, jakija nam naležać. U bahažy jaho stvaralnikaŭ, akramia svaich šou, jość jašče i paśpiachovyja ŭłasnyja knihi i błohi, piša VVS.
Dziva što minimalizm staŭ takim papularnym. U sučasnych damach ciapier sapraŭdy šmat rečaŭ — dla amierykanskich damoŭ ich ličba składaje ŭ siarednim 300 tysiač. Suprać hetaha zmahajecca tak zvany «ruch mikradamoŭ», jakija zvyčajna zajmajuć nie bolš za 40 kvadratnych mietraŭ. Mikradamy dapamahajuć realizavać žadańnie źnizić košt žyćcia i zrabić jaho bolš prostym i volnym.
Ale minimalizm značna starejšy za siońniašnija tendencyi, jamu kala 2500 hadoŭ. Uźniknieńnie minimalizmu źviazvajuć ź fihuraj Dyjahiena. Hety fiłosaf amal nie mieŭ majomaści: u jaho byŭ płašč, kij i skuranaja torba. Da taho ž, jon zusim nie karystaŭsia hrašyma. Takim čynam Dyjahien admaŭlaŭsia ad pryncypaŭ hramadstva, źviazanych z abaviazkovym nazapašvańniem majomaści i nabyćciom niejkaha sacyjalnaha statusu, to-bok jon byŭ samym pieršym minimalistam.
Praz paru socień hadoŭ u staražytnaj Hrecyi ŭźnikaje rodnasnaja minimalizmu fiłasofija staicyzmu. Asnoŭnyja pryncypy stoikaŭ — prosty ład žyćcia, pryniaćcie pieramien i kancentracyja na sabie i supolnaści, a nie na majomaści.
Vodhuki staicyzmu možna znajści ŭ knizie našaj sučaśnicy Hretchien Rubin «Paradak zvonku, spakoj unutry». Rubin vieryć u toje, što materyjalnyja pradmiety majuć svajo duchoŭnaje vymiareńnie i što my časta zajmajemsia šopinham, kab realizavać niejkija niemateryjalnyja patreby, naprykład, kab paradavać rodnych. Jana śćviardžaje, što, kali ludzi pazbaŭlajucca niepatrebnych rečaŭ, jany adčuvajuć siabie našmat bolš enierhičnymi i zdolnymi kancentravacca na spravach, a taksama jany bačać pierad saboj bolš mahčymaściaŭ.
Ale hałoŭnym minimalistam płaniety chutčej možna nazvać brytanskaha architektara Džona Poŭsana. Jon praktykuje minimalistyčny padychod u pracy ŭžo bolš za 40 hadoŭ, stvarajučy ŭ takim styli abjekty nakštałt modnych kram, muziejaŭ i navat chramaŭ. Adzin z pryncypaŭ padychodu Poŭsana sfarmulavany ŭ jaho słovach: «Treba šmat praktyki, kab pazbaŭlacca ad lišniaha da taho momantu, kali ŭžo bolš nie možaš adymać».
