Ženia. Fota dasłała Iryna Varačkova
— Ženia čałaviek tvorčy, tamu toje, što ŭ jaje z saboj byŭ bałončyk z farbaj, dla mianie nie dziŭna. Uviečary 29 sakavika jana hulała z dvuma siabrami. Kali jany išli pa vulicy Pulichava, dačka dastała bałončyk, namalavała na travie sercajki i napisała na piešachodnaj darožcy «žyvie», — apisvaje situacyju Iryna. — Pobač, jak akazałasia, stajaŭ bus ź milicyjaj. Supracoŭniki zaŭvažyli, što jana zrabiła, i padletkaŭ zabrali.
Ich pryvieźli ŭ Partyzanski RUUS Minska. Pra zatrymańnie dački, praciahvaje Iryna, adrazu joj nichto nie paviedamiŭ. Bližej da 22.00 mama pačała chvalavacca, što na vulicy pozna, a dziciaci niama, i pačała sama telefanavać Ženi. U 22.10 dziaŭčynka źniała trubku.
— U hety momant telefon u Ženi ŭziaŭ śledčy. Jon paviedamiŭ, što dačka zatrymanaja, jaje apytvajuć, i paprasiŭ pryjechać. «Što zdaryłasia?» — spytała ja, jon adkazaŭ, maŭlaŭ, rastłumačyć na miescy, — raspaviadaje Iryna.
Pa słovach žančyny, kali jana pryjechała ŭ RUUS, joj skazali: «Čakajcie». Jana stała ŭdakładniać u dziažurnaha źviestki supracoŭnika, jaki zatrymaŭ jaje dačku, i taho, chto ź joj kamunikuje, ale, kaža, adkazu nie atrymała. U vyniku žančyna pakinuła skarhu.
— Kali ja była ŭ milicyi, pryjechali baćki dvuch inšych dziaciej. Ja tak razumieju, śledčy patelefanavaŭ im paśla razmovy sa mnoj, — kaža Iryna i znoŭ viartajecca da situacyi z Ženiaj. — Dačku apytvali ŭ prysutnaści piedahoha, mianie da jaje nie puścili. Kali ich znosiny skončylisia i dziaciej vyvieli, śledčy raspavioŭ, što Ženia napisała na asfalcie «žyvie». Pravaparušeńnie ździejśniła jana, a jaje siabry — śviedki. Ja pacikaviłasia, a ci daŭno ŭ nas ličycca złačynstvam toje, što dzieci malujuć na asfalcie. Na što mnie rastłumačyli: jana ž napisała słova «žyvie». Ja zaśmiajałasia, abniała dačku i skazała: «Ty małajčyna, ja taboj hanarusia».
U toj dzień, praciahvaje Iryna, nijakich papier im na ruki nichto nie davaŭ. U suviazi z hetym žančyna pakinuła druhuju skarhu. U joj, kaža, napisała, što Ženiu dapytvali bieź jaje i joj, jak maci, nie dali aznajomicca z pratakołam apytańnia dziciaci.
— Paźniej Ženia mnie raspaviała, što ich zatrymali dzieści a 19.30 (u pratakole napisana, što pravaparušeńnie dziaŭčyna ździejśniła blizu 20.30. — zaŭvaha Tut.by). Vychodzić, prykładna dźvie z pałovaj hadziny mnie nichto nie paviedamlaŭ, što dzicia ŭ milicyi, — kaža surazmoŭnica. — Raniej my z dačkoj abmiarkoŭvali, kali tak zdarycca, što jaje raptam zatrymajuć, jana adrazu ž pavinna skazać: «Mnie 13 hadoŭ» — i paprasić patelefanavać baćkam. Ženia raspaviadaje, što patelefanavać mnie joj nie davali.
«Skazali, vy ž razumiejecie, słova «žyvie» ŭ spałučeńni ź jašče adnym słovam vielmi šmat čaho aznačaje»
Pa słovach Iryny, tak na druhi dzień vyhladaŭ nadpis, jaki zrabiła jaje dačka. Fota dasłała Iryna Varačkova
8 krasavika Irynie patelefanavali z Partyzanskaha RUUS. Žančynu paklikali ŭ milicyju na razmovu.
— Ja patłumačyła, čamu maja dačka napisała «žyvie» pa-biełarusku. Ženia z troch hadoŭ tančyć narodnyja tancy. Biełaruskaja kultura ŭ jaje ŭ kryvi ledź nie z naradžeńnia, — uspaminaje tuju razmovu mama. — Na heta mnie adkazali, što ŭ moładzi nie pryniata havaryć na biełaruskaj. Da taho ž, skazali, vy ž razumiejecie, słova «žyvie» ŭ spałučeńni ź jašče adnym słovam vielmi šmat čaho aznačaje. Ja adkazała: nie razumieju. U vyniku mnie razdrukavali pratakoł administracyjnaha pravaparušeńnia.
U dakumiencie napisana: Iryna nie vykanała abaviazki pa vychavańni svajoj niepaŭnaletniaj dački, jakaja 29 sakavika kala 20.30 pablizu doma №51 pa vulicy Pulichava naniesła na asfalcie nadpis «žyvie» farbaj fijaletavaha koleru z bałončyka, čym parušyła paradak praviadzieńnia masavaha mierapryjemstva. Heta vyjaviłasia ŭ pryniaćci joj aktyŭnaha ŭdziełu ŭ pikietavańni, jakoje nie było ŭzhodniena ź Minharvykankamam. Zrabiła jana heta, paznačana ŭ pratakole, «z metaj publičnaha vykazvańnia svajho pratestu pa fakcie praviadzieńnia sumlennych vybaraŭ». U vyniku parušyła č. 1 art. 24.23 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Adnak, pakolki ŭ momant pravaparušeńnia školnicy było ŭsiaho 13 hadoŭ, to pratakoł skłali na mamu — č. 1 art. 10.3 KaAP (Nievykanańnie abaviazkaŭ pa vychavańni dziaciej). Pakarańnie pa hetym artykule — štraf da dziesiaci bazavych (290 rubloŭ).
Apieratyŭna atrymać kamientar u pres-słužby HUUS Minharvykankama Tut.by nie atrymałasia. Jak tolki my jaho atrymajem, jon budzie apublikavany.