Na heta źviarnuli ŭvahu administratary telehram-kanała Ekanomika pa-biełarusku.
Nasamreč situacyja kštałtu takoj — ekstraardynarnaja i skandalnaja. U vypadku Biełhazprambanka ŭ 2020-m mieła miesca ŭmiašalnictva rabotnikaŭ siłavych struktur, a što ž było ŭ Parytetbanku?
Znajomyja ź situacyjaj krynicy tłumačać, što historyja adbyłasia kala čatyroch hadoŭ tamu i nabyła novaje jurydyčnaje žyćcio, kali bank pierastaŭ naležać dziaržavie (u 2020-m Parytetbank kupili stuktury Saida Huceryjeva — syna rasijskaha miljardera Michaiła Huceryjeva).
Fota: tut.by
Maŭlaŭ, hrošy źnikli takim čynam — rabotnica depazitaryja ŭstupiła ŭ zmovu sa svaim chłopcam-zamiežnikam, jaki ŭ abaznačany čas pryjšoŭ u depazitaryj i ź jaje dapamohaj uskryŭ niekalki jačejek, vyśvidravaŭšy ich.
Dakładny pamier składzienaha acanić niemahčyma, bo damovy ab tym, kolki čaho lažyć u jačejcy, nie afarmlalisia — heta tajamnica.
Kali ab situacyi paviedamili ŭłaśnikam paciarpiełych jačejek, siarod ich znajšoŭsia kiemlivy piersanaž.
«Siarod usioj zajaŭlenaj na toj momant sumy škody 90% było ahučana mienavita im, tyja samyja $600 tysiač. U banku zadalisia pytańniem i pasprabavali fizična raźmiaścić stolki hrošaj u jačejcy — nie ŭłaziła. Paprasili abhruntavać pachodžańnie srodkaŭ — ničoha nie dabilisia.
Potym nibyta słužba biaśpieki vyśvietliła, što jon u svoj čas byŭ sudzimy za machlarstva. Ź viartańniem usioj ahučanaj sumy ŭ jaho, naturalna, byli prablemy, bo bank nie pavieryŭ jamu. Jašče kali Parytetbank naležaŭ Kiraŭnictvu spravami prezidenta, jon chadziŭ i pahražaŭ administracyi, što ŭsich zasudzić. Tady heta ŭsprymałasia ź ironijaj, imavierna, toj čałaviek vyrašyŭ jašče raz pasprabavać zabrać $600 tysiač paśla taho, jak źmianiŭsia ŭłaśnik», — raskazaŭ top-mieniedžar banka.
U vyniku sud pryniaŭ bok klijenta.
