Kali Biełaruś prymie rašeńnie ab ustupleńni ŭ Radu Jeŭropy, to pytańnie ab uviadzieńni maratoryja na śmiarotnuju karu budzie nieabchodna vyrašać.
Pra heta 17 červienia zajaviŭ kiraŭnik Administracyi prezidenta Uładzimir Makiej padčas pasiadžeńnia Hramadska‑kansultatyŭnaje rady (HKR). Jano było pryśviečana prablemie humanizacyi pienitencyjarnaj sistemy i prajšło ŭ Žodzinie (Smalavicki rajon, Minskaja vobłaść) na terytoryi papraŭčaj ustanovy «Turma № 8».
«Pytańnie ab śmiarotnaj kary nie treba razhladać jak niešta zastyłaje nazaŭsiody, — skazaŭ Makiej.
— Ja taksama sustrakaŭsia sa spadarom Ryhoni (śpiecdakładčyk PARIE pa Biełarusi. — BiełaPAN.), i my na hetu temu doŭha razmaŭlali. U nas užo pamienšyłasia kolkaść artykułaŭ u Kryminalnym kodeksie, za jakija davali śmiarotnuju karu, i na praktycy takoje pakarańnie stali prymianiać radziej. Tym bolš što heta (pytańnie admieny śmiarotnaj kary. — BiełaPAN.) treba razhladać u kantekście ŭstupleńnia Biełarusi ŭ Radu Jeŭropy. Pakul my havorym tolki ab viartańni statusu śpiecyjalnaha zaprošanaha.
Ale kali budzie dakładnaje rašeńnie ab ustupleńni ŭ Radu Jeŭropy, to nam daviadziecca pajści na hety krok (uvieści maratoryj na śmiarotnuju karu. — BiełaPAN.)».
Staršynia Biełaruskaha Chielsinkskaha kamiteta Aleh Hułak nahadaŭ členam rady, što Biełaruś zastajecca adzinaj krainaj u Jeŭropie, dzie vynosiać śmiarotnyja pryhavory i pryvodziać ich u vykanańnie. «I, kali havaryć ab humanizacyi pienitencyjarnaj sistemy, to śmiarotnaja kara — heta taja prablema, jakuju nieabchodna vyrašać», — adznačyŭ Hułak.
Kiraŭnik BCHK taksama nahadaŭ pra pa sutnaści stanoŭčaje zaklučeńnie Kanstytucyjnaha suda ad 2004 hoda ab mahčymaści admieny śmiarotnaj kary. Kažučy pra toje, što da admieny vyšejšaj miery nie hatova biełaruskaje hramadstva, Hułak zaŭvažyŭ, što sacyjałahičnaja bolšaść prychilnikaŭ śmiarotnaj kary nad jaje praciŭnikami u mnohim rastłumačvajecca niedastatkovaj infarmavanaściu hramadstva. «Pradumanaja miedyjnaja kampanija dazvolić stvaryć stanoŭčaje salda prychilnikaŭ admieny śmiarotnaj kary», — upeŭnieny Aleh Hułak.
Člen HKR, staršynia Sajuzu piśmieńnikaŭ Biełarusi Mikałaj Čarhiniec ličyć, što ŭ pytańni admieny śmiarotnaj kary treba nie pryśpiešvać padziei, «a iści pastupova». «Jość ideja i rekamiendacyja ab uviadzieńni maratoryja, treba pravieści rastłumačalnuju pracu z nasielnictvam, uvieści maratoryj, a potym vychodzić z pytańniem admieny śmiarotnaj kary na refierendum, tak jak takaja miera pakarańnia była padtrymanaja nasielnictvam na refierendumie», — skazaŭ jon.
Aleh Hułak, u svaju čarhu, adznačyŭ, što całkam možna abyścisia i biez refierenduma. «Ci pryniać ukaz prezidenta ab maratoryi na śmiarotnuju karu, ci prosta zakonam ab uniasieńni źmianieńniaŭ u Kryminalny kodeks vyklučyć ź jaho taki vid pakarańnia, jak śmiarotnaja kara», — skazaŭ staršynia BCHK.
