Škarpetki ad Mark Formelle
Natalla Siŭcova-Siaduškina žyvie ŭ Minsku pobač z kinateatram «Kastryčnik».
U sieradu, 24 sakavika, milicyja źviarnuła ŭvahu na bałkon jaje kvatery: na im byli zaviazanyja čyrvonyja i biełyja stužački.
Siłaviki pryjšli da jaje dadomu, źniali stužki i pavieźli haspadyniu ŭ RUUS Savieckaha rajona, tam na jaje skłali pratakoł za pikietavańnie. Na nastupnyja sutki (a heta byŭ Dzień Voli) adbyŭsia sud, jaki pryznaŭ Natallu vinavataj u administracyjnym pravaparušeńni i pryznačyŭ joj štraf 70 bazavych vieličyń (2030 rubloŭ).
— Ja viarnułasia z suda i ŭviečary taho ž dnia, prykładna ŭ 19.28, adpraviłasia na kursy kiroŭcaŭ — jany pačynalisia ŭ 20.00. Tolki vyjšła z arki doma, jak sa śpiny da mianie padyšli čaćviora siłavikoŭ u bałakłavach i čornaj vopratcy, — uspaminaje pra padziei žančyna.
Pa słovach Natalli, joj paviedamili, što ŭ jaje «škarpetki nie taho koleru». Minčanka kaža, što jaje «padniali i panieśli» za kinateatr — tudy, dzie stajali aŭtazaki. Natalla prasiła pastavić jaje na nohi, maŭlaŭ, jana pojdzie sama i ŭciakać nie źbirajecca.
— Napeŭna, ja sapraŭdy była davoli prykmietnaj: biełyja kurtka i krasoŭki, sinija karotkija džynsy i biełyja škarpetki z čyrvonaj pałasoj vytvorčaści Mark Formelle, jakija byli bačnyja napałovu. Ale chiba heta parušeńnie? Ja spakojna išła, nikomu nie zaminała i nikoha nie čapała.
Zatrymanuju dastavili ŭ RUUS Savieckaha rajona. Tam jaje pratrymali bolš za try hadziny — Natalla paviedamiła, što ŭ jaje niepaŭnahadovaje dzicia. Žančyna vyjšła ź milicyi z čarhovym pratakołam, składzienym na jaje pa č. 1 art. 24.23 KaAP. Sud razhledzieŭ hetuju spravu ŭžo na nastupny dzień, ale rašeńnie nie pryniaŭ — adpraviŭ materyjały na dapracoŭku.
— Ja paprasiła sud zapytać zapisy z kamier vonkavaha videanazirańnia, na jakich było vidać, jak ja išła pa praśpiekcie, jak mianie zatrymlivali. Taksama sama chacieła padrychtavacca — dakazać, što ja išła pa spravie, na kursy.
Padčas nastupnych sudovych pasiadžeńniaŭ Natalli paviedamili, što zapis z kamiery dać niemahčyma — praź miesiac paśla zatrymańnia jon užo byŭ vydaleny.
Milicyja «dapracavała» pratakoł: ciapier u im było napisana, što žančyna nie prosta išła ŭ BČB-škarpetkach (tolki heta było paznačana ŭ pieršym pratakole), ale i padymała ŭvierch ruku z palcami, składzienymi ŭ «V». U adkaz na jaje žest joj sihnalili aŭtamabili.
U vyniku sud pad staršynstvam Siarhieja Šaciły (darečy, jon sudziŭ Natallu i za stužački) vynies rašeńnie pa spravie: aštrafavać Natallu na 80 BV — 2320 rubloŭ. Infarmacyja pra zatrymańni Natalli i sudy paćviardžajecca źviestkami vałancioraŭ, jakija adsočvajuć infarmacyju pra zatrymanych i sudovyja pasiadžeńni.
Pakul Natalla nie apłacić štraf, to kanfiskavanyja ŭ jaje telefon i broška buduć aryštavanyja.
— Ciapier ja vinna 4350 rubloŭ. Takich hrošaj na pahašeńnie štrafu ŭ mianie niama, choć ja pracuju, ale adkładać zapasy mahčymaściaŭ nie maju. Sprabavała apratestavać rašeńnie suda pa stužkach — jaho pakinuli ŭ sile. Ciapier budu sprabavać apratestavać rašeńnie pa škarpetkach, — kaža žančyna.
Heta nie pieršaja historyja, kali zatrymlivali z-za bieła-čyrvonych škarpetak.
Takich škarpetak ad Mark Formelle, u jakich była Natalla padčas zatrymańnia, užo niama ŭ prodažy. Na heta źviarnuli ŭvahu čytačy. Takija ž biełyja, ale z čornaj pałasoj, jość u prodažy, a z čyrvonaj — nie. Taksama čytačy źviarnuli ŭvahu, što nie mohuć znajści ŭ kramach biełyja majki z pryntam, na jakim słova «Biełoruśsija» čyrvonymi litarami było vypraŭlena na «Biełaruś».
«U našaj kampanii ŭsio vypuskajecca nievialikimi sieryjami, asartymient chutka abnaŭlajecca. Zaraz pastupaje novaja kalekcyja. Spadziajomsia, jana spadabajecca pakupnikam», — rastłumačyli ŭ Mark Formelle.
