Alaksandr Łukašenka padčas razmovy z premjer-ministram Ramanam Hałoŭčankam uźniaŭ temu mahčymych jeŭrapiejskich sankcyj. Jaho zajavy apublikavaŭ telehram-kanał «Puł Pieršaha».
— Asabliva jeŭrapiejcy ščyrujuć u hetym. Ja nie budu tut raspaŭsiudžvacca, vykazvać niejkija dumki, prosta skažu, kab vy razumieli: kali jeŭrapiejcy chočuć prablem u siabie ŭ suviazi z hetymi sankcyjami, jany ich atrymajuć. Bolš ničoha nie budu kazać. Čas pakaža. Ale vas paprašu, jak heta było pierad amierykanskim hetym vypiandrožam u ekanomicy, dajcie mnie infarmacyju ab najbolš bujnych jeŭrapiejskich prajektach u nas i pradpryjemstvach, jakija stvorany na terytoryi Biełarusi: pahladzim na ich pracu.
Premjer-ministr zaŭvažyŭ, što niekatoryja miery ŭ adkaz biełaruskija ŭłady ŭžo raspačali.
— Pravilna, pravilna, ja baču. Ale heta tolki pačatak, — adkazaŭ Łukašenka.
Taksama jon pastaviŭ uradu zadaču razam z MZS pahladzieć na dziejnaść u Biełarusi pa zachodnich humanitarnych prahramach.
— Hetyja niekamiercyjnyja arhanizacyi, zamiežnyja ahienty, roznaha rodu bandyty, jakija ładziać tut abdzirałaŭku dy inšaje. Ja daručaŭ kiraŭniku Administracyi, vy Siarhiejenku pieradajcie, što ja na kantroli heta trymaju. My damaŭlalisia ab pierarehistracyi i hetych arhanizacyj, i srodkaŭ masavaj infarmacyi, — nahadaŭ jon. — A to jany nas trymajuć na karotkim łancužku i pačynajuć pastajanna, kali heta im zachočacca, tuzać. Vyhadna, niavyhadna — jany ŭžo, ja baču, pra heta nie dumajuć. Nu, nie dumajuć — dobra, buduć u Rasiju jeździć praz… buduć chadzić pa Bałtycy, pieravozić hruzy, i vakoł Ispanii — u Mižziemnaje mora i praz Čornaje mora, kali im drenna z narmalnaj Biełaruśsiu ŭ centry Jeŭropy.
30 sakavika Alaksandr Łukašenka padpisaŭ ukaz №128 «Ab prymianieńni śpiecyjalnych mier», jakim praduhledžvajecca ŭviadzieńnie zabarony na ŭvoz na terytoryju Biełarusi i realizacyju na jaje terytoryi tavaraŭ, krainaj pachodžańnia jakich źjaŭlajucca dziaržava, jakaja ŭžyła sankcyi ŭ dačynieńni da biełaruskich kampanij abo fizičnych asob.
U kancy krasavika ŭrad Biełarusi ŭvioŭ sankcyjnyja miery i zabaraniŭ na paŭhoda ŭvoz na terytoryju krainy pradukcyi kampanij Skoda Auto, Liqui Moly i Beiersdorf «dla zabieśpiačeńnia abarony nacyjanalnych intaresaŭ, z ulikam niedružalubnych dziejańniaŭ u dačynieńni da biełaruskaha naroda». Hetyja sankcyi ŭdarać pieradusim pa rasijskich zavodach hetych kampanij i ich biełaruskich dylerach.
