Mižnarodny valutny fond padtrymlivaje rašeńnie Biełarusi ab pašyreńni kalidora vahańniaŭ abmiennaha kursu.
Kiraŭnik misii MVF u Biełarusi Krys Džarvis zajaviŭ u Vašynhtonie: «My padtrymlivajem rašeńnie Nacyjanalnaha banka Respubliki Biełaruś ab pašyreńni kalidora abmiennaha kursu ź plus/minus 5% da plus/minus 10%. Pašyreńnie kalidora pavyšaje hnutkaść režymu kursaŭtvareńnia, što dazvolić Biełarusi lahčej adaptavacca da źniešnich šokaŭ».
«Niadaŭniaje pastupovaje asłableńnie abmiennaha kursu ŭ miežach kalidora palepšyć stan płaciežnaha bałansu Biełarusi.
Pryniataje na minułym tydni rašeńnie Nacbankam ab pavyšeńni pracentnaj staŭki pa kredytach oviernajt dla kamiercyjnych bankaŭ taksama było stanoŭčym krokam, jaki sadziejničaje stabilnaści ekanomiki i abmiennaha kursu», — skazaŭ Džarvis.
U studzieni 2009 hoda faktyčnaja pryviazka kursu da dołara ZŠA była zamieniena pryviazkaj da košyka valut. U skład košyka valut uvachodziać dołar ZŠA, jeŭra i rasijski rubiel, pryčym kožnaja valuta maje roŭnuju vahu.
Raniej paviedamlałasia, što pašyreńnie miežaŭ kalidora valutnaha košyka da 10% źjaŭlajecca adnym z patrabavańniaŭ MVF dla vydzialeńnia druhoha tranšu kredytu, adnak hetaja infarmacyja aficyjna nie paćviardžałasia.
Miž inšym, niezaležnyja ekanamisty ličać, što kalidor vahańnia kursu rubla budzie pašyracca jašče nie raz.
Tak, u pryvatnaści, ličyć kiraŭnik Navukova‑daśledčaha centra Miziesa Jarasłaŭ Ramančuk. «Dla hetaha jość makraekanamičnyja padstavy», — zajaviŭ jon, kamientujučy BiełaPAN rašeńnie Nacbanka.
«Pastupovaja devalvacyja rubla vidavočnaja, — ličyć ekśpiert. — Nacbank reahuje na situacyju na valutnym rynku, pry ekspartnych pastaŭkach, a taksama na mahčymaść atrymańnia zamiežnych kredytaŭ i inviestycyj. Zamiežnych inviestycyj nie chapaje, valuty ŭ krainie mała. Dla taho kab pryniać hetyja fakty i nie pałochać subjekty ekanamičnaj dziejnaści, Nacbank pryniaŭ rašeńnie ab pašyreńni valutnaha kalidora».
Pavodle mierkavańnia Ramančuka, «ułady trymajuć kurs na pastupovuju pakrokavuju devalvacyju i razavaha šokavaha rašeńnia nie budzie».
«Da vieraśnia my budziem nazirać pastupovaje asłableńnie rubla i pryviadzieńnie jaho da kursu, što składvajecca pry ździełkach na pryvatnym rynku, — 3.300 rubloŭ za dołar», — prahnazuje jon.
