— Usiaho 15 čałaviek było zatrymana. Niekatorych prosta z pracy zabrali. U ich prajšli pieratrusy. Mnohich adpuścili, ale pierad hetym skłali administracyjnyja pratakoły. U adnaho rabotnika — «kryminałka», — raspaviali kalehi.
Havorka idzie ab rabotnikach padraździaleńnia siejsmaraźviedki. Za što mienavita zatrymali i sudzili ludziej, pakul niezrazumieła. Kalehi miarkujuć, što mužčyny razmaŭlali ŭ niefarmalnym karparatyŭnym čacie, dzie svabodna vykazvali svaje dumki z nahody hramadska-palityčnaj abstanoŭki ŭ krainie, — i «skazali niešta nie toje».
Nahadajem, dva dni tamu stała viadoma pra zatrymańnie rabotnika «Biełarusnafty» Dźmitryja Hryščanki, jaki ŭ kastryčniku minułaha hoda zapisaŭ videazvarot ad imia supracoŭnikaŭ pradpryjemstva suprać hvałtu. Pa słovach siabroŭ Dźmitryja, zatrymali jaho nibyta za «sprobu schavacca», choć pad padpiskaj ab niavyjeździe jon nie byŭ. Miesiac tamu ŭ Dźmitryja doma pravodziŭsia pieratrus. Ale tady nijakich pretenzij da jaho z boku siłavikoŭ nie było, jaho nie zatrymlivali, i jon praciahvaŭ chadzić na pracu.
Siońnia Tut.by ad znajomych Dźmitryja stała viadoma, što jaho zatrymali pa padazreńni ŭ arhanizacyi biesparadkaŭ. Siońnia pavinny albo vyzvalić jaho, albo vystavić jamu abvinavačańnie.
Kamientaroŭ ad pradpryjemstva, jak skazali Tut.by u «Biełarusnafcie», nie budzie.
U vieraśni rabotnik «Biełarusnafty» Siarhiej Kraŭčanka z Rečycy zapisaŭ videazvarot da svaich kalehaŭ. U im jon zajaviŭ, što maje namier syści na strajk. «Nie chaču svaimi padatkami karmić ludziej, jakija nas źbivajuć», — patłumačyŭ svaje płany Siarhiej. Adnak pa fakcie strajkavać nie atrymałasia. Praź niekatory čas paśla taho, jak byŭ apublikavany videazvarot, Siarhiej razam ź siamjoj źjechaŭ z krainy. Mužčyna kaža, što heta pryjšłosia zrabić z-za bojazi za siabie i svaich rodnych i na toje byli padstavy.
26 kastryčnika 2020 hoda, u dzień ahulnanacyjanalnaj zabastoŭki, šeść supracoŭnikaŭ upraŭleńnia pramysłova-hieafizičnych rabot zapisali videazvarot, u jakim vykazali pratest suprać hvałtu i biezzakońnia, jakoje jany nazirali ŭ svajoj krainie. Praz hadzinu paśla apublikavańnia rolika ŭ Rečycu z Homiela pryjechali kiraŭniki pradpryjemstva i adbyłasia surjoznaja razmova. Rabotnikaŭ prasili «abvierhnuć svoj učynak». Ale jany byli niepachisnyja i dali zrazumieć, što ad svajoj hramadzianskaj pazicyi admaŭlacca nie majuć namieru. Nieŭzabavie mužčyn zvolnili. Niekatorym pryjšłosia źjechać z krainy.
