Fota pixahive.com
Hałaŭnyja boli i mihreni — duža raspaŭsiudžanaja źjava. Naprykład, amal u kožnaj čaćviortaj amierykanskaj siamji chacia b adnamu čałavieku davodzicca pakutavać ad mihreniaŭ.
Daktary ličać, što, kali čałaviek rehularna maje hałaŭnyja boli napružańnia i mihreni, ale dobra siabie adčuvaje ŭ pramiežkach pamiž bolami, jamu nie treba ni pra što turbavacca — akramia, zrazumieła, pazbaŭleńnia ad niepryjemnych simptomaŭ. Ale kali bol prymaje niezvyčajny charaktar, heta moža być sihnałam taho, što zdaroŭju pahražaje surjoznaja niebiaśpieka, piša Huffpost.
Pa-pieršaje, varta ŭvažliva stavicca da raptoŭnaha i vielmi mocnaha prystupu hałaŭnoha bolu, asabliva kali raniej u vas uvohule nie baleła hałava. Taki bol moža być prykmietaj anieŭryzmy hałaŭnoha mozhu. Padčas hetaj chvaroby ścienki kryvianosnaha sasuda ŭ mozhu robiacca słabymi, i praz heta ŭ im źjaŭlajecca vypukłaść, dzie nakoplivajecca kroŭ. Ź ciaham času kroŭ moža pačać vyciakać z sasuda ci ŭvohule jaho razarvać, što vyklikaje insult, tamu pry źjaŭleńni takoha bolu varta maksimalna terminova źviarnucca da miedykaŭ.
Kali ž čałaviek zaŭvažaje ŭ siabie pastajanny hałaŭny bol, jaki da taho ž uzmacniajecca ranicaj, heta moža być prykmietaj puchliny hałaŭnoha mozhu. Zvyčajna takija boli majuć miesca jakraz u toj častcy hałavy, dzie znachodzicca puchlina.
Fota pixabay.com
Treba być uvažlivymi i da kambinacyi hałaŭnoha bolu ź inšymi simptomami. Naprykład, razam ź lichamankaj, sypam i skavanaściu muskułaŭ šyi bol moža śviedčyć pra zaraznuju chvarobu kštałtu mieninhitu. Heta vostraja bakteryjalnaja infiekcyja, jakaja zakranaje abałonku mozhu. A hałaŭny bol razam ź lichamankaj, strataj abo źmienaj pačućciaŭ smaku ci niuchu dy stomlenaściu — prykmiety kavidu.
Isnujuć i inšyja typy hałaŭnych bolaŭ. Jany ŭźnikajuć, kali čałaviek ustaje na nohi, abo paharšajucca ź ciaham času. Jany mohuć śviedčyć pra zanadta vialiki ci zanadta mały cisk. Uvohule treba šukać pryčynu luboha chraničnaha bolu, tym bolš kali jon abvastrajecca.
Narešcie, treba ŭličvać uzrost taho, chto pakutuje na hałaŭny bol. Kali hetamu čałavieku nie mienš za 50 hadoŭ i raniej u jaho nikoli nie baleła hałava, bol moža być simptomam chvaroby pad nazvaj skronievy arteryit. Jaje sutnaść u tym, što ŭ arteryjach hałavy pačynajecca zapaleńnie, što pryvodzić da mocnych bolaŭ, prablem sa zrokam i adčuvańnia słabaści. Tamu, kali charaktar hałaŭnych bolaŭ u takim uzroście źmianiŭsia, heta taksama pryčyna naviedać doktara.
Takim čynam, terminovaja miedycynskaja dapamoha patrebnaja ŭ vypadku, kali hałaŭny bol sumiaščajecca ź nieŭrałahičnymi simptomami, naprykład: prablemami sa zrokam, słabaściu ŭ kaniečnaściach i/ci nierazborlivym maŭleńniem. Kali ž zvykły dla čałavieka bol kardynalna źmianiajecca, heta jašče nie padstava vyklikać chutkuju, ale varta pryznačyć vizit da doktara na najbližejšy čas. U vypadku sa stałymi, ale nie nadta intensiŭnymi bolami lepiej prosta paviedamić pra ich doktaru pry nastupnaj mahčymaści.
