Fota pixabay.com.
2021 hod adznačyŭsia dla Polščy rostam mihracyi ŭ krainu. Kali ŭ minułym hodzie dazvoł na žycharstva ŭ krainie atrymali trochi mienš za 160 tysiač čałaviek, to sioleta, hledziačy pa tempach pieršych čatyroch miesiacaŭ, hetaja ličba pavialičycca da 210 tysiač. Siarod imihrantaŭ u Polšču najbolš ukraincaŭ, ale taksama adčuvajecca ŭzdym mihracyi ź Biełarusi, piša Wyborcza.pl.
U 2019 hodzie Polšča vydała biełarusam prykładna 9 tysiač dazvołaŭ na žycharstva, u ciažkim dla nas 2020 hodzie ličba źniziłasia da trochi bolš čym 8 tysiač. Sioleta ž, kali tempy mihracyi biełarusaŭ u Polšču nie źmieniacca, na ich budzie prychodzicca amal 15 tysiač dazvołaŭ na žycharstva, to-bok bačny rost amal u dva razy.
Andžej Kubisiak, polski ekśpiert pa mihracyi, tłumačyć heta ciažkim stanoviščam u biełaruskaj ekanomicy. U Polščy rabotniki tych ža śpiecyjalnaściej zarablajuć u 2-2,5 razy bolš, čym u Biełarusi, i ŭ Polščy vielmi sproščanyja pracedury afarmleńnia dla mihrantaŭ z Ukrainy i Biełarusi.
Letaś polski ŭrad chutka pryniaŭ prahramu, što palahčaje pierajezd hramadzianam Biełarusi.
Vialikaja častka biełarusaŭ, jakija pierabirajucca ŭ Polšču, pracujuć u IT-śfiery. Takich ludziej sotni, kali nie tysiačy, i dla ich jość praca, bo polskija IT-kampanii ŭžo nie pieršy hod skardziacca na niedachop supracoŭnikaŭ. Ciapier kraina moža vyrašyć hetuju prablemu.
