Dniami hazeta «Viečiernij Minsk» paviedamiła, što nieŭzabavie tralejbusy źniknuć z byłoha praspektu Mašerava – ad vulicy Sapioraŭ (kala «BiełEkspa») da HUMa. Rašeńnie pra heta 6 lipienia pryniaŭ Mienharvykankam. Na hety raz źniaćcio tralejbusaŭ tłumačycca kłopatam pra histaryčny centar Miensku. Siońnia na zhadanym učastku chodziać try tralejbusnyja maršruty ŭ try spalnyja rajony – Viaśnianku, Masiukoŭšŭčynu i Paŭdniovy Zachad.
Nahadajem, što 21 červienia byli skasavanyja tralejbusnyja maršruty na praspekcie Skaryny ad płoščy Jakuba Kołasa da Maskoŭskaha aŭtavakzału. Zamiest 5-ci źmienienych abo skaročanych tralejbusnych maršrutaŭ (№№1, 2, 37, 54, 55) byŭ pradoŭžany aŭtobusny maršrut №100. Pryčynaj skasavańnia była nazvanaja «aptymizacyja transpartnaha absłuhoŭvańnia». Reakcyja mienčukoŭ na hetaje rašeńnie, miarkujučy pa internet-aktyŭnaści, była nehatyŭnaj.
Pačatkam źniknieńnia tralejbusaŭ z haradzkich vulic było skasavańnie ruchu pa praspekcie Skaryny ad płoščy Niezaležnaści da płoščy Jakuba Kołasa 10 vieraśnia 2002 hodu. Siarod pryčynaŭ nazyvalisia znošanaść tralejbusnych aporaŭ, niepavarotlivaść tralejbusaŭ, nieestetyčny vyhlad kantaktnych sietak i… plany pa chutkim pieraŭtvareńni praspekta Skaryny ŭ piešachodnuju zonu. Usie tralejbusnyja maršruty byli zamienienyja adnym aŭtobusnym – №100. U vyniku byli razarvanyja transpartnyja suviazi praspektu z vulicaj Kujbyšava i Kamaroŭskim rynkam (były t.m. №43), vulicaj Majakoŭskaha i Červieńskim rynkam (były t.m. № 5).
