Pa słovach pradstaŭnika Kramla, u piatnicu byli aficyjnyja pieramovy lidaraŭ, a ŭ subotu — niefarmalnaja častka.
Piaskoŭ paviedamiŭ, što druhi tranš kredytu ad Rasii u $500 młn z 1,5 młrd Minsk atrymaje najbližejšym časam, da kanca červienia, nijakich pieraškod niama, usio ŭzhodniena.
Piaskoŭ paviedamiŭ, što temu pierachodu da adzinaj valuty Pucin i Łukašenka ŭ Sočy nie zakranali. Łukašenka nie staviŭ pytańnie ab dadatkovaj ekanamičnaj dapamozie Biełarusi.
Vysnovy jeŭrapiejskich krain pa incydencie z samalotam Ryanair zasnavanyja vyklučna na emocyjach, a nie na sprobie rastłumačyć abstaviny. Z punktu hledžańnia Maskvy situacyja patrabuje ŭdumlivaha i kanstruktyŭnaha razhladu, zajaviŭ Piaskoŭ.
Pucin i Łukašenka daručyli Ministerstvam transpartu dźviuch krain «arhanizavać usie aśpiekty pavietranych znosin».
«Mintransam dźviuch krain — Rasii i Biełarusi — dadziena daručeńnie arhanizavać usie aśpiekty pavietranych znosin, u tym liku z ulikam nadychodziačaha pieryjadu adpačynkaŭ i z ulikam vialikaj kolkaści hramadzian Biełarusi, jakija chočuć pryjechać na Čarnamorskaje ŭźbiarežža Rasii, a taksama, što niemałavažna, z ulikam taho, što vialikaj kolkaści hramadzian Biełarusi treba budzie niejak viartacca na svaju radzimu», — skazaŭ pradstaŭnik Kramla.
«Abmiarkoŭvalisia pytańni arhanizacyi pavietranaha ruchu z ulikam rašeńnia jeŭrapiejskich uładaŭ, mnohich avijakampanij, jakija pierastali latać praz pavietranuju prastoru, z ulikam taho, što «Biełavija» bolš niežadany hość u jeŭrapiejskich haradach», — adznačyŭ pradstaŭnik Kramla.
Rasijski lidar padniaŭ pytańnie zatrymanaj u Minsku hramadzianki Rasii Sapieha, jaje los Maskvie nieabyjakavy. Jon daručyŭ MZS Rasii samym uvažlivym čynam adsočvać spravu rasijanki.